736
Майн 10-най мэдээгээр, амаралтын үдэрнүүдтэ Буряад Уласта Баргажан, Загарай, Кабанск болон Мууяын аймагуудта 20 га газарай талмайда түймэр унтараагдаһан байна.
Баргажан аймагта түймэр саралгада Үбэр Байгалай авиа ойн харуулай баазын парашютистнар, ойн харуулшад, ажаһуугшад – бүхыдөө 100-аад хүн хабаадаһан байна. 25 түймэр сарадаг техникэ эндэ хэрэглэгдээ.
Загарай аймагта 240-өөд га талмайда түймэр һүжэржэ, унтараагдаа. Түймэр саралгада 67 хүн хабаадаа. 14 түймэр саралгын техникэ хэрэглэгдэбэ.
Амаралтын үдэрнүүдтэ хамта дээрээ 320 га талмайда гараһан 6 ойн түймэр сарагдаһан байна. Ажаһуугшадай хайша хэрэгээр хандаһанһаа боложо, түймэр һүжэрөө гэжэ Буряад Уласай ойн ажахын агентство мэдээсэнэ.
Буряад Уласта түймэрэй аюултай хаһан эхилһэнһэээ хойшо 13,7 мянган га талмайда гараһан 144 түймэр унтараагдаа. 2016 оной майн 10-най мэдээгээр, 14,2 мянган га талмайда гараһан 149 түймэр гараһан байна.
Үнгэрһэн амаралтын үдэрнүүдтэ ородой Холбоото Уласай Буряадтахи Онсо байдалай талаар яаманай, Буряад Уласай Дотоодын хэрэгүүдэй яаманай болон Ойн ажахын агентствын ажалшад шалгалтада гаража, онсо байдалай соносхогдоһон дүрим эбдэһэн 80 ушар элирүүлбэ.
Буряад Уласай Толгойлогшын уялга дүүргэгшэ Алексей Цыденовэй тогтоолой ёһоор, уласай газар дайдада түймэрэй аюултай хаһын онсо байдал соносхогдонхой.
Онсо байдалай үедэ ойдо орохо, хотонуудай, хүдөө нютагуудай газар дайдада гал түүдэг носоохо, хагда ногоо, бог шорой галдаха хоригдоно. Ойн хуулитай зохилдуулан, мэргэжэнги эмхинүүд ойн жасын газарнуудта түймэрһөө һэргылхэ зорилготойгоор гал носоохо эрхэтэй. Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай гэжэ Буряад Уласай ойн ажахын албан мэдээсэнэ. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно.
Эдэ дүримүүдтэ хайша хэрэгээр хандабал, хүнүүд 4 мянгаһаа 5 мянган түхэриг хүрэтэр, албанай түлөөлэгшэд – 25 000-һаа 45000 түхэриг хүрэтэр, юридическэ нюурнууд – 300 мянганһаа 500 мянган түхэриг хүрэтэр ялада тохогдохо юм. Хабартаа хагда галдаад, тэрэнээ унтараангүй ябашаха ушарһаа ехэнхи ойн түймэрнүүд гарадаг юм. Тэрэниие усадхахань ехэ хүндэ байдаг. Юундэб гэхэдэ, ехэ талмайда гараһан гал унтараахань хэсүү.
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
