751
“Буряад Уласай Социалис Ажалай Геройнууд” гэһэн хэблэгдэһэн номдо бүхы наһаараа хүдөө ажалда ябаһан, үндэр амжалтануудые туйлаһан хүнүүд тухай хэлэгдэнэ.
Буряад Уласай Засагай Түрүүлэгшын хүдөө ажахы хүгжөөлгын талаар орлогшын уялга дүүргэгшэ Даба-Жалсана Чириповой болон Буряад Уласай Хүдөө ажахын болон эдеэ хоолой яаманай дэмжэлгээр энэ ном хэблэлдэ гараһан байна. Номой автор Владимир Баторов Социалис ажалай 38 геройнууд, Ажалай Алдар Солын 1-дэхи, 2-дохи, 3-дахи шатын орденой хоёр кавалернууд тухай бэшээ. Тэдэнэй дунда колхозуудай түрүүлэгшэнэр, бригадирнууд, хонишод, һаалишад, огородой эдеэ ургуулагша болон һургуулиин директор бии. Олон жэлдэ ажалдаа үнэн сэхээр хандажа, хүдэлһэн габьяагай болон үндэр амжалтануудые туйлаһанай түлөө тэдэнэр үндэр нэрэ зэргэнүүдтэ, шагналнуудта хүртэһэн юм. Үшөө тиихэдэ, Буряадай гүрэнэй архив болон музейнүүдһээ абтаһан хоморой гэрэл зурагуудынь толилогдоһон байна.
- Хүдөө ажахын хүгжэлтэдэ хубитаяа оруулһан хүнүүд, урагшаа һанаатай, эдэбхи үүсхэл ехэтэй манай Социалис Ажалай геройнууд. Тэдэнэр колхоз, совхозуудай тогтожо байһан үедэ, шэрүүн дайнай үеын болон дайнай һүүлээрхи жэлнүүдтэ, поли дээрэ, хони малда, хүдөө нютагаа һэргээхэ, хүгжөөхэ хэрэгтэ өөр тухайгаа бодонгүй ажаллаа ха юм, - гэжэ Даба-Жалсан Чирипов хэлэбэ.
Хүдөө ажахын солото хүдэлмэришэдэй ажал тоо баримтануудаар харахада иимэ байна. Жэшээнь, Баргажанай дайдада оршодог байһан Кировай нэрэмжэтэ колхоз 1947 ондо 152 га газарһаа 22 центнер шэниисэ нэгэ гектар бүхэнһөө хуряаһан юм. Дайнай һүүлээрхи жэлнүүдтэ ажал хэхэ хүн зоной дутаалдаашье хада, шэрүүн уларилай байбашье, үндэр амжалта туйлагдаа. Эндэ харуулһан шэн габьяагай түлөө трактористнуудай бригадир Чоймпил Бадмаев Социалис Ажалай Геройн нэрэ зэргэдэ хүртэһэн байна.
Һонирхолтой дансанууд суглуулагдажа, авторай уран үгөөр шэмэглэгдэһэн ном олондо һайхашаагдаха байха.
- Үбгэ эсэгэнэрэйнгээ ажалай габьяа тухай хөөрэжэ, ургажа ябаа улаан бургааһадта ажалша хүн хэзээдэшьее хүндэтэй гэжэ ойлгуулха болонобди. Шэрүүн жэлнүүдтэ ажал хэжэ, нютагаа үргэһэн зон тухайгаа хөөрэжэ, тэдэнэрэй габьяа мартангүй ябаха болонобди, - гэжэ номой автор Владимир Баторов хэлэбэ.
Цырен-Ханда Дарибазарова энэ ном бэшэлсэһэн байна. “Улан-Удэнская птицефабрика” гэһэн хуби ниилүүлһэн бүлгэм “Буряад Уласай Социалис Ажалай Геройнууд” гэжэ ном хэблэжэ гаргаха хэрэгтэ тэдхэмжэ үзүүлһэн байна гэжэ Буряад Уласай хүдөө ажахын болон эдеэ хоолой яаманда мэдээсэнэ.
