713
Үнгэрһэн үдэрэй туршада Баргажан, Загарай, Кабанск болон Мууяын аймагуудай дэбисхэрэй 28 га талмайда гараһан түймэрнүүд сарагдаа. Түймэр унтараалгада ойн харуулшад, ажаһуугшад болон Үбэр Байгалай авиа ойн харуулай баазын парашютистнар хабаадаһан байна. 17 түймэр саралгын техникэ хэрэглэгдээ.
Майн 11-дэ Буряад Уласта түймэр гараһан тухай мэдээн бүридэхэлдэ абтаагүй гэжэ Ойн ажахын агентство мэдээсэнэ. Буряад Уласта түймэрэй аюултай хаһан эхилһэнһэээ хойшо 13,7 мянган га талмайда гараһан 144 түймэр унтараагдаа. 2016 оной майн 11-нэй мэдээгээр, 23 мянган га талмайда гараһан 167 түймэр гараһан байна.
Апрелиин 28-һаа Буряад Уласай газар дайдада түймэрэй аюултай хаһын онсо байдал соносхогдонхой.
Онсо байдалай үедэ ойдо орохо, хотонуудай, хүдөө нютагуудай газар дайдада гал түүдэг носоохо, хагда ногоо, бог шорой галдаха хоригдоно. Ойн хуулитай зохилдуулан, мэргэжэнги эмхинүүд ойн жасын газарнуудта түймэрһөө һэргылхэ зорилготойгоор гал носоохо эрхэтэй. Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай гэжэ Буряад Уласай ойн ажахын албан мэдээсэнэ. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно.
Эдэ дүримүүдтэ хайша хэрэгээр хандабал, хүнүүд 4 мянгаһаа 5 мянган түхэриг хүрэтэр, албанай түлөөлэгшэд – 25 000-һаа 45000 түхэриг хүрэтэр, юридическэ нюурнууд – 300 мянганһаа 500 мянган түхэриг хүрэтэр ялада тохогдохо юм. Хабартаа хагда галдаад, тэрэнээ унтараангүй ябашаха ушарһаа ехэнхи ойн түймэрнүүд гарадаг юм. Тэрэниие усадхахань ехэ хүндэ байдаг. Юундэб гэхэдэ, ехэ талмайда гараһан гал унтараахань хэсүү.
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
