939
Байгша оной эхеэр В.С. Мункинай нэрэмжэтэ Хэжэнгын лицейн соносхоhон уран уншалгын «Сэдьхэлэй жэгүүр» гэhэн харалга дэмбэрэлтэй үйлэ хэрэгээр түгэсэбэ.
Буряад Уласай багшанарай дунда үнгэргэгдэhэн энэ мүрысөөндэ Хориин хоёрдохи hургуулиин буряад хэлэнэй багша Дугарова Людмила Николаевна (гэрэ зураг дээрэ буряад хубсаһатай зогсоно) Д.Улзытуевай "Тайлган" уран гоёор уншажа, "Бага театр" номинацида эрхимлэhэн юм. Хабаадаhан бүхы багшанарай олоной дуугаар энэл дүй дүршэлтэй багша "Сэдьхэлэй жэгүүр" гэhэн тусхай шанда хүртөө юм. Олон жэлдэ үндэhэн хэлэндээ үхибүүдые hургажа, гамтайгаар дамжуулжа ябаhан багшын, эхын, Хори нютагай хатан эхэнэрэй абьяас дүүрэн ажалынь, талаан бэлигынь гэршэлhэн тусхай шан тон таарамжатай оршондо барюулагдаба!
Апрелиин хориной үдэр хун шубуудые холын аянhаань угтамжа, эхэ хүниие хүндэлhэн баяр ёhолол Хоридо үнгэрбэ. Аймагай заншалта болоhон hайндэртэ үри бэеэ өөдэнь болгон далижуулhан элдэб яhанай солото эжынэрhээ гадна мүн лэ түрэлхи буряад хэлэеэ эрхимээр шудалжа ябаhан 28 hурагшад шагналнуудта хүртөө. Хүхэ мүнхэ тэнгэри доро сэржэмээ үргэжэ, хун шубуудаа угтажа зогсоhон "Хориин хатан" хүшөөгэй дэргэдэ үнгэрhэн үйлэ хэрэгые Людмила Николаевна Дугарова шадамар hайханаар хүтэлбэрилөө юм.
"Сэдьхэлэй жэгүүр" Хэжэнгымнай бэлигтэй залуу нарин дархан Ринчинов Одон Баировичай уран бүтээл болоно.
Автор: буряад хэлэнэй багша
