730
Майн 15-най тоо баримтаар, Буряад Уласта түймэрэй гараһан тухай 4 мэдээн бүридэхэлдэ абтаа гэжэ Ойн ажахын агентство мэдээсэнэ.
Мухаршэбэрэй болон Хойто-Байгалай аймагуудта 17 га талмайда түймэр гаража, усадхагдаа. Зэдэ болон Хойто-Байгалай аймагуудта 120 га газарта түймэр унтараагдажа байна.
Үнгэрһэн амаралтын үдэрнүүдтэ Загарай, Ивалга болон Мууяын аймагуудта 4 ойн түймэр һүжэрөө. Галда абтаһан талмай 40-өөд га болоо. Түймэр унтараалгада 120-ёод хүн хабаадаһан байна. Хойто-Байгалай аймагта Үбэр Байгалай авиабаазын ойн харуулай парашютистнар түймэр унтараалсана. Үшөө тиихэдэ, 30-аад гаран түймэр сараадаг техникэ хэрэглэгдээ.
Түймэрэй аюултай хаһын эхилһээр, 14 мянган га талмайда гараһан 153 түймэрнүүд тухай бүридхэлдэ абтаһан байна. 2016 оной майн 15-най мэдээгээр, 36,1 мянган газарай талмайда 188 түймэр һүжэрөө. Буряад Уласай Толгойлогшын уялга дүүргэгшэ Алексей Цыденовэй 2017 оной майн 12-ой тогтоолоор Буряад Уласта түймэрэй аюултай хаһын онсо байдал болюулагдажа, түмэрэй аюултай хаһын онсо гурим соносхогдонхой.
Гуримай ёһоор ойн жаса руу орохо огто хоригдоно! Энэ гурим эбдэһэн хүнүүд 4 мянгаһаа 5 мянган түхэриг хүрэтэр, албанай түлөөлэгшэд – 25 000-һаа 45000 түхэриг хүрэтэр, юридическэ нюурнууд – 300 мянганһаа 500 мянган түхэриг хүрэтэр ялада тохогдохо юм.
Хотонуудай, хүдөө нютагуудай газар дайдада гал түүдэг носоохо, хагда ногоо, бог шорой галдаха хоригдоно. Ойн хуулитай зохилдуулан, мэргэжэнги эмхинүүд ойн жасын газарнуудта түймэрһөө һэргылхэ зорилготойгоор гал носоохо эрхэтэй. Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай гэжэ Буряад Уласай ойн ажахын албан мэдээсэнэ. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно.
Эдэ дүримүүдтэ хайша хэрэгээр хандабал, хүнүүд 3 мянгаһаа 4 мянган түхэриг хүрэтэр, албанай түлөөлэгшэд – 15 000-һаа 25000 түхэриг хүрэтэр, юридическэ нюурнууд – 150 мянганһаа 250 мянган түхэриг хүрэтэр яла түлэхэ юм..
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
