646
Майн 17-һоо Буряад Уласай хойто аймагуудта “Ангара” авиакомпаниин самолёдууд ниидэжэ эхилхэнь.
Улаан-Үдэ – Нижнеангарск – Улаан-Үдэ, Улаан-Үдэ – Таксимо – Улаан-Үдэ гэһэн шэглэлэй самолёдой сэн 30%-оор доошолоо. Нижнеангарск хүрэтэр 6 мянган түхэригөөр долоон хоногой 3 дахин, Таксимо хүрэтэр 7 мянган түхэригөөр долоон хоногой 2 дахин ниидэжэ ошохоор юм.
Буряад Уласай Толгойлогшын уялга дүүргэгшэ Алексей Цыденов хойто аймагуудай ажаһуугшадтай уулзаһанай удаа, Арадай Хуралай апрелиин сессиин үедэ самолёдуудай сэн доошолуулха, тэдэнэй оло дахи ниидэдэг болохо тухай хуулиин ёһоор баталха тухай дурадхал оруулһан байна.
Арадай Хурал энэ дурадхал дэмжэжэ, Буряад Уласай Хуулида хубилалтануудые оруулһан байна. 2017 ондо энэ хэрэгтэ 43,453 млн. түхэриг мүнгэн, 2018 ондо 64,559 млн. түхэриг мүнгэн һомологдохоор хараалагданхай.
- Самолёдоор ниидэхэ сэн доошологдожо, авиа замай һалбари, улас дотор аяншалга хүгжөөлгэдэ нүлөөлхэ болоно, - гэжэ Алексей Цыденов хэлэһэн байна.
“Ангара” авиакомпаниин сайтһаа (www.angara.aero) билет худалдажа абабал, нэмэлтэ мүнгэн гаргашалагдахагүй гэжэ Буряад Уласай Транспортын яаманда мэдээсэнэ.
