658
Буряад Уласай Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной үүхэлээр залуушуулай олониитын эмхинүүдэй үзэсхэлэн Засагай газарта дэлгэгдэһэн байна. Энэ хэмжээ ябуулгада “Хара Морин”гэһэн КВН-эй команда, “АМО” гэһэн залуушуулай нэгэдэлнүүдэй эблэл, “ДАРИ” гэһэн Уласай олониитын эмхи, “Парк” гэһэн эдэбхитэй залуушуулай эмхи гэхэ мэтэ хабаадаһан байна.
“Ородой Холбоото Уласай оюутадай бүлэг” гэһэн эмхиин Буряадтахи таһагай хүтэлбэрилэгшэ Константин Поспелов зунай сагта залуушуулые ажалаар хангалга тухай хөөрэжэ үгэбэ. Тэрэнэй хэлэһээр, олон оюутад зунай сагта ажалтай болохо аргатай юм. Залуушуулда түлэгдэхэ салин 15 мянган түхэригһөө 120-ёод мянган түхэриг болотор хүрэдэг.
“Хранители Байкала” гэһэн Уласай олониитын эмхиин түрүүлэгшэ Дулма Содномова ниигэмэй талаар суг хүдэлхэ нүхэдые бэдэрнэбди гэжэ хэлэбэ. Энэ эмхи Байгал далай хамгаалха, аршалха түсэлнүүдые бэелүүлдэг. Үшөө тиихэдэ, Буряад Уласта һанаһан үйлэ хэрэгээ бэелүүлхээр гэжэ гэршэлжэ, буряад арадайнгаа ёһо заншал сахиха, хүгжөөхэ талаар ажал ябуулдаг юм.
“Байгал” гэһэн Залуушуулай аяншалгын түбэй хүтэлбэрилэгшэ Виктор Власовай хэлэһээр, 2015 ондо хүндэ байдалда ороһон 12-16 наһатай үхибүүдтэй ажал ябуулха талаар 2 түсэл бэелүүлһэн байна. 2016 ондо тэдэнэр уласхоорондын хэмжээндэ гаража, “Сердце Байкала” гэһэн түсэлдэ Германиин олониитэ хабаадалсана.
Залуушуулай эмхинүүд эрхэтэдэй олониитын институт хүгжөөлгэдэ ямар үүргэ дүүргэнэб гэһэн асуудалаар хэлсэхэ дүхэриг шэрэйн урид энэ хэмжээ ябуулга үнгэргэгдэһэн байна гэжэ Буряад Уласай Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной түрүүлэгшэ хэлэбэ.
Анна Огороднигой гэрэл зураг.
