​Баунтын дасанай барилга

Һая болотор Буряадай хойто аймаг болохо Баунтада дасан дугангууд үгы байгаа. Тиигэжэ эндэхи ажаһуугшад 2014 ондо дасанай барилга эхилхэ гэжэ шиидээ hэн. Түрүүн багахан дуган баригдаад, буддын шажанай талаар хэрэг бүтээгдэдэг болоо. Гурбан ламанар иишэ ерэжэ, энэ буянта хэрэг үйлэдэнэ.

«Даша даржалин» гэһэн дасанай барилгын эхилхэдэ, Монгой нютагай нэгэ айл нэгэ сая түхэриг хандиб үргэжэ, тон ехэ туһа хүргөө. Баунтын газар дэбисхэр дээрэ эгээл түрүүшын дасан байгуулгын ажал эхилжэ, газар үгтэжэ хорёологдоо. Уншалгын “һэеы гэр” баригдажа, ажал бүтээхэ гэр байранууд бии болонхой.

- Манай аймагта элдэб яһатан ажаһуудаг, зүгөөр Буддын шажанда шүтэдэг зон олон. Арад зон өөрынгөө хубитаяа оруулжа, хандиб үргэжэ, буян олоно гээшэ. Буддын номнол хүнэй сэдьхэлэй байдал тэнсүүлхэ, амгалан байдал үршөөхэ, арюудхаха шэдитэй ха юм, гурбан Эрдэни бултаниие хамгаалжа байг лэ даа, - гэжэ Баунтын дасанай соржо Баатар лама хэлэнэ.

Багаханшье hаа хандиб оруулжа, хойто аймагай хүн зоной амгалан тэнюун ажаһуудалда туһалха, буян үйлэдэхэ бидэ булта аргатайбди. Дасан дуган бодхоолгодо үргэһэн хандиб дээдын ехэ буян гэжэ мэдээжэ.

Хэрбээ Баунтын түрүүшын дасан барилгын нангин хэрэгтэ туһалха гэбэл, 4276090014227391 гэһэн счёдто хандиб оруулхада болоно.