​Нютагай эдеэн шэмэтэй

Буряадта хүүгэдэй лагерьнуудта 88 мянга 200 үхибүүд амарха гээд хараалагдана. Бүхыдөө үхибүүдые элүүржүүлгын элдэб түхэлэй 577 эмхи ажаллаха юм. Тэдэнэй 29-иинь хотын шадархи эмхинүүд, санаторно түхэлэй 3 лагерь, 59 майхан лагерь, үдэрэй туршада ажалладаг 404 лагерь, ажалай болон амаралгын 82 лагерь тоологдоно. 

Буряад Уласай Толгойлогшын уялга дүүргэгшэ Алексей Цыденовэй тэмдэглэһээр, зунай амаралтада үхибүүдэй эдеэн тон һайн шанартай байха ёһотой.

- Нютаг дээрээ үйлэдбэрилһэн эдеэгээр хангагдаха шухала. Красноярск гү, али Новосибирскдэ үйлэдбэрилһэн һүн бэшэ, өөһэдын байха ёһотой. Энэ шэглэлээр Худалдаа наймаанай, Хүдөө ажахын болон Тамирай яамануудые ажал ябуулхыень дурадханаб. Хэн эдеэнэй зүйлөөр ханганаб гэжэ элирүүлээд, өөһэдөө худалдажа абахабди. Эдеэгээр хангадаг эмхинүүдые тодорхойлогты, - гэжэ Алексей Цыденов тэмдэглээ. 

2017 ондо “Үхибүүдэй амаралга эмхидхэхэ” тухай Буряад Уласай засаг түрын тогтоолдо оруулагдаһан хубилалта нэмэлтэнүүдэй ёһоор, элүүржүүлгын эмхинүүд заабол лицензи абажа, реестртэ бүридхэгдэхэ уялгатай. Буряад Уласһаа гадуур, үхибүүд Краснодарай хизаарай Хара далайн эрьедэ амарха, мүн уласхоорондын болон бүхэроссиин хэмжээнэй “Артек”, “Орлёнок”, “Смена” болон Монгол Уласай “Найрамдал” лагерьнуудта элүүржүүлэгдэхэ юм.