​Һүүлшын хонхо жэнгирээ

Ородой Холбоото Уласта майн 25-да заншалта ёһоороо юрэнхы болбосоролой бүхы һургуулинуудта һүүлшын хонхо жэнгирбэ. Энэ жэлдэ Буряад Уласта дүн хамта 5122 һурагша дунда һургуули дүүргэнэ гэжэ Болбосоролой болон эрдэм ухаанай яаманай мэдээсэлэй албан дуулгаһан байна. Бидэ Үндэһэтэнэй 1-дэхи лицей-hургуулиин һүүлшын хонхын баяр ёһололдо хабаадалсабабди. 

Байгша ондо лицей-hургуули дүүргэгшэд түрэл һургуулиингаа түүхын алтан жасада оробо. Юуб гэхэ- дэ, тэдэнэр 55-дахи выпуск болоно. Мүнөө жэлдэ ангиин хүтэлбэрилэгшэ Елена Викторовна Санжиева болон хүмүүжүүлэгшэ Арина Данзановна Цыренова хоёрой ударидалга доро 27 һурагша hургуули дүүргэжэ гараба гээшэ. Һүүлшын хонхын баяр ёhолол 10 сагта лицейн стадион дээрэ эхилжэ, һайханаар хубсалһан бүхы һурагшад, багшанар, айлшад гэртэхинтэеэ хүтэрэлдөөд, стадион дээрэ гаража ерэһэн 11-дэхи ангиие дүүргэгшэдые халуун альга ташалгаар угтан абабад. 

Арсалан Жамбаловай гэрэл зурагууд дээрэ 11-дэхи анги дүүргэгшэд

Тэдэнэрэй хүндэлэлэй дүхэриг хэжэ ябаха үедэнь һайндэрые хүтэлэгшэд элдэб мүрысөөнүүдтэ хабаадаһан, шалгарһан һурагшадые нэрлэбэд. Тэдэнэй дунда hургуулиин президент, «Lex» олимпиадада түрүү һуури эзэлһэн, КВН-эй гэшүүн, Уласхоорондын «Баатар, Дангина-2017» нааданда 2-дохи һуурида гараһан, Москва хотодо үнгэрһэн Ородой Холбооной һурагшадай хүдэлөөнэй слёдто хабаадагша Элбэк Чимитов; нютаг можо хоорондын «Четыре неба» мүрысөөнэй шанда хүртэгшэ, «Ученик года-2017» гэһэн урилдаанай лауреат Артур Федоров; «Эрудит» гэһэн бүлгэмэй гэшүүн, «Ученик года-2016» мүрысөөнэй шанда хүртэгшэ Золто Раднаев; сэрэгэй албанда бэлдэлгын спартакиадын илагша Геннадий Лубсанов; эрхим тамиршадай нэгэн, Новосибирск хотодо үнгэргэгдэһэн Сибириин оюун ухаанай нааданда хабаадагша Сергей Мижитов; энэл нааданда хабаадагша, «Клио» командын капитан, «LEX» олимпиадада илагша Гэсэр Цыремпилов; «Бэлигэй туяа» конференциин шанда хүртэгшэ, буряад хэлээр болон обществознаняар үнгэргэгдэһэн олимпиадануудта хоёр дахин илажа гараһан Нарана Ангаева; «2016 оной Сагаалганай мүшэхэнүүд» гэһэн уласай мүрысөөндэ Гран-при абаһан, «Ода миру» гэһэн Уласхоорондын фестивалиин шанда хүртэгшэ Сарана Дашинимаева; тон эдэл хэмжээ ябуулгануудта шалгарһан Дыжид Цыренова; «Серебряные струны» мүрысөөндэ шалгарагша, «LEX» олимпиадада илагша Екатерина Галданова; «Баатар, Дангина -2017» гэһэн мүрысөөндэ Гран-при абаһан Адисса Галсанова; «Ломоносовой ассамблейдэ» илажа гараһан, «Россиин 300 бэлигтэй үхибүүдэй» тоодо ороһон, «Холокостын хэшээлнүүд» гэһэн эрдэм шэнжэлэлгын мүрысөөнэй лауреат, боксоор Ородой Холбооной командын гэшүүн, Сибириин федеральна тойрогой мүрысөөндэ хоёр дахин илажа гараһан, спортын мастерта кандидат Наталья Шульгина гэгшэд болоно. 

Арсалан Жамбаловай гэрэл зураг

Буряад Уласай Болбосоролой болон эрдэм ухаанай сайдай уялга дүүргэгшэ Баяр Жалсанов, һургуулиин захирал Булат Шойнжонов, Болбосоролой болон эрдэм ухаанай яаманай тамирай таһагай түлөөлэгшэ Евгения Ахтасова, «Ородой һурагшадай хүдэлөөн» эмхиин Буряадай нютаг можын таһагай түлөөлэгшэ Баир Шобоев

Тиигэһээр лицейн гимн зэдэлжэ, нэн түрүүн һургуулиин захирал, хэлэ бэшэгэй эрдэмэй дид доктор Булат Баирович Шойнжонов дүүргэгшэдые, гэртэхиниие, шабинарые, багшанарые амаршалжа, энэ жэлдэ һургуулиингаа туйлаһан амжалтануудые нэрлээ һэн. Удаань Буряад Уласай Болбосоролой болон эрдэм ухаанай яаманай сайдай уялга дүүргэгшэ Баир Баторович Жалсанов мүн лэ hургуули дүүргэгшэдые амаршалаад, саашанхи харгыдань амжалтануудые хүсэбэ. Болбосоролой болон эрдэм ухаанай яаманай спортын болон тамирай таһагай түлөөлэгшэ Евгения Федоровна Ахтасова урда гаража, ГТО-гоор илгаран гарагшадта алтан тэмдэгүүдые зүүлгэбэ. Һүүлээрнь «Ородой һурагшадай хүдэлөөн» гэһэн эмхиин Буряадай нютаг можын таһагай түлөөлэгшэ Баир Владимирович Шобоев баярай үгэнүүдые хэлэбэ. Саашань һургуулиин һуралсалай талаар захиралай орлогшо Дашама Дамбаевна Цыбикова, соёлой 8-дахи һургуулиин захирал Татьяна Владимировна Гунгаева болон эдэ хүбүүд, басагадые «А» үзэгтэ һургаһан түрүүшынь багша Дугарма Дымбрыловна Шойнжонова гэгшэд үгэнүүдые хэлээ. Дугарма Дымбрыловна, Буряад Уласай габьяата багша, энэ һургуулида 27 жэлэй туршада хүдэлжэ байна. Эдэ үхибүүд минии 8-дахи выпуск гэжэ хэлэнэ.

Арбаад жэлэй саанахана 

Арбагар жааханууд ябаалта, 

«А», «Б-е» мэдэхэгүй 

Ахирханууд байгаалта!

Танихаар бэшэ тётинууд, 

Томо гэгшын дядинууд, 

Таанар мүнөө болоот даа, 

Танһаа жэшээ абахабди, 

Таанар мандаа хүндэтэйт,

- гэжэ ерээдүйн халаан – 1-дэхи ангиин шабинар аханараа амаршалжа, зониие баясуулба.

Арсалан Жамбаловай гэрэл зураг

Хүүгэд шүлэг уншана

– Нэн түрүүн үхибүүдээ амаршалнаб. Мүнөө 11 хүбүүд, 16 басагад hургуули дүүргэжэ гараба гээшэ. Арбан нэгэн жэлдэ һураха гээшэмнай ехэхэн хугасаа ха юм даа. Саашадаа шалгалтануудаа һайнаар баряад, дээдэ һургуулинуудта бултадаа орохыетнай хүсэнэб, - гэжэ хүмүүжүүлэгшэ Арина Данзановна уяран хэлэбэ. 

Гэртэхин мүн лэ уяран, хүүгэдээрээ омогорхон байнад.

– Иимэ һайхан наратай дулаахан үдэр һүүлшын хонхын баяр боложо байна. Би өөрөө 23 жэлэй саана энэ һургуули дүүргэжэ гараһан байнаб. Мүнөө манай хүбүүн Аюша һургуули дүүргэбэ. Хүбүүнэймнай хаанашье ябахадаа, урагшатай байхань дамжаггүй. Юуб гэхэдэ, энэ һургуулиин бэлигтэй багшанар Аюшадамнай амаргүй hайн эрдэм олгуулаа, hайнаар хүмүүжүүлээ, тэрэнь бүхы наһандань тулга боложо байха гэжэ һананаб. Һургуулияа дүүргэжэ байһан бултаниие амаршалаад, саашанхи харгыдань амжалта хүсэнэб, - гэжэ гэртэхинэй зүгһөө Буряад Уласай мэдээжэ дуушан Зоригто Тогочиев хэлэбэ. 

Һурагшадай зүгhөө Элбэг Чимитов харюугай үгэнүүдые хэлэбэ: «Арбан нэгэн жэлдэ эндэ һуража гараһандаа ехэ баяртайб. Эдэ жэлнүүдтэ бидэнэр булта аха дүүнэр шэнги болообди. Бидэ саашадаа түрэл һургуулияа ходо һанажа, нэрэ солыень дээрэ үргэжэ, суурхуулжа ябахабди гэжэ найдуулнабди. Энэ болбол манай нангин уялга гээшэ». 

Һүүлээрнь 11-дэхи ангиинхид вальс хатарба, дуу хангюурдаба, багшанартаа үнэн зүрхэнэй баярай үгэнүүдые хэлэбэд. Һайндэрэй түгэсхэлдэ Федоров Артур 1-дэхи ангиин шаби Жалсанова Сашые мүр дээрээ һуулгаад, халуун альга ташалган доро һүүлшын хонхо жэнгирүүлбэ.