893
“Бурятзолото” гэһэн хуби ниилүүлһэн нээмэл бүлгэм Аха болон Мууяын аймагуудай захиргаантай хамта ниигэмэй удха шанартай түсэлнүүдые бэелүүлхэ программануудай конкурсын дүнгүүдые согсолбо. Хоёр аймагуудта бэелүүлэгдэхэ 20 түсэлнүүдтэ энэ бүлгэм 1 млн. түхэриг мүнгэ һомолхо.
3-дахи жэлээ эмхидхэгдэһэн энэ конкурс хадаа нютагай хүгжэлтэдэ удха шанартай түсэлнүүдые бэелүүлхэ гэжэ ажаһуугшадай эдэбхи үүсхэл дэмжэхэ гэһэн зорилготой. Энэ мүрысөөндэ илагшадые мэргэжэлтэ шүүбэришэд элирүүлһэн байна. Буряад Уласай Толгойлогшын захиргаанай болон Засагай газарай нютаг дэбисхэр хүгжөөхэ талаар хорооной, Байгаалиин нөөсэнүүдэй яаманай, “Клуб Фирн” гэһэн эрхэтэдэй үүсхэл хүгжөөхэ талаар уласай ниитэ эмхиин болон энэ конкурс эмхидхэһэн “Бурятзолото” бүлгэмэй, Ахын, Мууяын аймагуудай захиргаанай түлөөлэгшэд жюриин гэшүүд болобо.
Энэ мүрысөөнэй дүнгүүдээр Аха аймагта бэелүүлэгдэхэ 9 түсэл дэмжэхэ гэжэ шиидхэбэри абтаба. “Спортивная площадка “Окбарс” гэһэн түсэлөөр Өөрлиг һууринда мүнөө үеын тамирай нээмэл талмай баригдаха. “Стрелы серебряной полет” түсэл зохёогшод Аха аймагай дүрбэн һомоной хүдөө нютагуудта һур харбалгаар мастер-классуудые үнгэргэхэ. Үшөө тиихэдэ, ёһо заншал сахиха талаар бэлдэгдэһэн түсэлнүүд тэдхэмжэдэ хүртэхэ юм. Шагай наада дэлгэрүүлхэ зорилготой хүүгэдэй эколого-аяншалгын “Барс” гэһэн түбэй оруулһан дурадхал дэмжэгдэбэ. Өөрлигэй дунда һургуулида модо уранаар болбосоруулха хэрэгсэлнүүд абтаха. Саяны һууринда “Ариг сэбэр нютаг” гэһэн түсэлөөр бог шоройн полигон хоройлогдохо. Үшөө тиихэдэ, грантын мүнгөөр тамирай байшанда шэнэ хэрэгсэлнүүд, Ахын социальна-реабилитационно түбтэ хүмүүжэдэг хүүгэдые хүгжэм дуунда һургаха зорилготой хүгжэмэй инструментнүүд абтаха, хүүгэдэй наадаха талмай баригдаха юм.
Мууяын аймагта 11 түсэл бэелүүлгэдэ мүнгэн гаргашалагдаха. Эндэ Мууяын Адаг һууринда хүүгэдэй талмай болбосон түхэлтэй болгохо. “Созвездие” гэһэн соёлой байшанай дэргэдэ нэгэтэйһээ гурба наһатай болотор үхибүүдтэй гэртэхиндэ “Мама и малыш” гэһэн түсэлөөр үхибүүдтэеэ хамта суг зохёохы ажал ябуулха кабинет бэлдэгдэхэ.Нэмэлтэ һуралсалай “Созвездие” гэһэн түбтэ хатарай заал болон хубсаһа эсхэхэ, хэбүүдые бэлдэхэ техническэ бааза шэнэдхэгдэхэ юм. Северомуйск һууринда зунай сагта газаа кинотеатр табигдаха. Хатарай бүлгэмэй үхибүүдтэ шэнэ костюмууд оёгдохо, эрэмдэг бэетэй үхибүүдтэ зохёохы хээшээлнүүдые үнгэргэхэ планшетнэ хүүхэлдэйнүүд абтаха түсэбтэй.
“Бурятзолото” бүлгэмэй грантын хүсөөр ниигэмэй удха шанартай түсэлнүүд бэелүүлэгдэхээр хараалагдана. Грантда хүртэхэ мүрысөөндэ бүхыдөө 45 мэдүүлгэ ороһон байна. Энэ конкурсдо илаһан түсэлнүүд 2017 оной октябриин 31 болотор бэелүүлэгдэхэ ёһотой. Тэрэнэй дүнгүүд 2017 оной декабрь һарада согсологдохо гэжэ “Бурятзолото” бүлгэмдэ мэдээсэнэ.
