814
Байгша оной июниин 5-най мэдээгээр Буряад Уласай Мууяын аймагта түймэрэй аюултай хаһын соносхогдоһон онсо байдал үргэлжэлһөөр. Аймагай газар дайдада 655 га талмайда 3 ойн түймэрэй һүжэрһэн тухай бүридхэлдэ абтаһан байна. Таксимо һуурин шадар 15 га талмайда болон 530 га газарта гараһан түймэрнүүд сарагдаа. Үшөө тиихэдэ, 110 га талмайда һүжэрһэн түймэр унтараагдажа байна.
Үнгэрһэн үдэрэй туршада Зэдэ аймагта нэгэ га талмайда гараһан түймэр усадхагдаа. Бүхыдөө түймэр унтараалгада 120-ёод хүнүүд хабаадажа, 23 түймэр саралгын техникэ хэрэглэгдэһэн байна.
Буряад Уласай газар дайдада түймэрэй аюултай хаһын онсо журам соносхогдонхой.
Онсо журамай үедэ ойдо орохо хоригдоно. Энэ дүрим эбдэһэн хүнүүд 4 мянгаһаа 5 мянган түхэриг хүрэтэр, албанай түлөөлэгшэд – 20 000-һаа 40000 түхэриг хүрэтэр, юридическэ нюурнууд – 300 мянганһаа 500 мянган түхэриг хүрэтэр ялада тохогдохо юм.
Хотонуудай, хүдөө нютагуудай газар дайдада гал түүдэг носоохо, хагда ногоо, бог шорой галдаха хоригдоно. Ойн хуулитай зохилдуулан, мэргэжэнги эмхинүүд ойн жасын газарнуудта түймэрһөө һэргылхэ зорилготойгоор гал носоохо эрхэтэй. Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай гэжэ Буряад Уласай ойн ажахын албан мэдээсэнэ. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно. Эдэ дүримүүдтэ хайша хэрэгээр хандабал, хүнүүд 3 мянганһаа 4 мянган түхэриг хүрэтэр, албанай түлөөлэгшэд 15 мянганһаа 25 мянган түхэриг хүрэтэр, юридическа нюурнууд 150 мянганһаа 250 мянган түхэриг хүрэтэр ялада тохогдохо.
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
