854
Эмүүдэй бүридэлдэ орохо ногоо, сэсэг ургуулха һалбариин хүгжэлтэ “Онсо шухаг Байгал” гэһэн федеральна программаар бэелүүлэгдэнэ. Һаяхана энэ асуудалаар Түнхэн аймагай нютагай засагай байгууламжын захиргаанда дүхэриг шэрээ үнгэргэгдэһэн байна.
Байгал шадарай газар дайдын хизаарта оршодог нютагуудта бүхы дэлхэйдэ хэрэглэхээр эмэй һалбари хүгжөөн байгуулха тухай энэ түсэл эрхилэгшэд хэлэбэ.
- 2017 -2025 онуудта Буряад Уласта, Үбэр Байгалай хизаарта болон Эрхүү можодо эмтэ домто ногоо ургуулха һалбари хүгжөөхэ Концепци “Онсо шухаг Байгал” гэһэн федеральна программын хүсөөр байгуулагдажа эхилээ. Ногоо ургуулха һалбари хүгжөөлгэдэ ариг сэбэр оршон тойрон шухала болоно. Тиимэһээ Түнхэн аймагай газар дайда энэ хэрэгтэ тааруу, - гэжэ Буряад Уласай олониитэтэй харилсаха албанай захирал Лариса Бочанова тэмдэглэбэ.
Түбэд эмнэлгын талаар мэргэжэлтэ шүүбэришэ, Эрхүү хотодо оршодог
“Лаборатория биотехнологий” гэһэн компаниин захирал Вячеслав Пляскинай хэлэһээр, Түнхэнэй газарай хүрьһэндэ галта уулын зүйлнүүдэй байһаниинь эм домто ногоо ургуулхада таараха.
- Манай аймагта энэ һалбари дахинаа һэргэхэнь. Юундэб гэхэдэ, совет засагай үедэ сиинэ болон алтан үндэһэ ургуулдаг байһан юм. Тиимэһээ манай нютагта эм домто ногоо ургуулхын тула шэнэ технологи үзэжэ, бэелүүлхэ шухала. Элүүржүүлгын аяншалга хүгжөөжэ, түбэд эмнэлгын талаар манай эрдэмтэдэй туйлаһан амжалтануудые хэрэглэхэдэ болоно, - гэжэ Түнхэн аймагай дарга Иван Альхеев хэлэбэ.
Эмтэй домтой ногоо ургуулха талаар үмсын ажахынуудта тусхай талмайнуудые бэлдэжэ, фермернүүдые энэ асуудалаар һургаха гэжэ түсэбөөр хараалагданхай. Энэ хэрэг бэелүүлхэ талаар ажалай бүлэг байгуулагдажа, тэрэнэй бүридэлдэ аймагай һалбаринуудай, олзын хэрэг эрхилэгшэдэй түлөөлэгшэд болон фермернүүд орохо юм.
