749
Буряад Уласай Байгал шадарай аймагта засаг зургаануудай түлөөлэгшэдэй хабаадаһан зүблөөндэ һунгамалнууд аймаг дотор мүнгэн үлэнэгүй гэжэ мэдүүлээд, энэ асуудал октябриин 20-доор үнгэргэгдэхэ съезд дээрэ зүбшэн хэлсэхэ тухай дурадхал оруулба.
Аймагуудай түлөөлэгшэдэй хэлэһэнэй ёһоор, татабаряар ороһон мүнгэн нютагай мэдэлдэ үлэнэгүй. Тиихэдэ баһа дээдэ засаг зургаанай гаргаһан тогтоолнуудые дүүрэн бэелүүлхэ уялгатай байһанаа тэмдэглэнэ. Иимэ шахардуу байдалда ороһон нютагай захиргаанууд хүдөө нютагуудайнгаа хүгжэлтэ тухай хэлэхэ аргагүй болоно. Тэдэнэр гансал эндэ тэндэ “нүхэ бүглэнэбди” гэжэ мэдүүлнэ.
- Аймагай мэдэлдэ НДФЛ-һээ ороһон мүнгэн лэ үлэнэ. Нютагай бюджедтэ ороһон мүнгэн бага байна. Уласай бюджедһээ ородог мүнгэнэй хэмжээн һүүлэй табан жэлдэ хубилаагүй. Зайн галай түлбэриин ургахада бүришье хүндэ болоо. Акцизуудай түлөө түлэһэн мүнгэ 10 процентһээ 20 хүрэтэр ехэ болгохо хэрэгтэй гэжэ дурадханабди, - гэжэ Байгал шадарай аймагай һунгамалнуудай Зүблэлэй түрүүлэгшэ Юрий Пантелеев хэлэнэ.
Нютагай хүтэлбэри мүнгэ зөөриин-эдэй засагай бата бэхи үндэһэ һууритай байха ёһотой. Налогой хуулида заһабаринуудые оруулха хэрэгтэй. Манай аймагта дархан газар бии. Татабариин талаар тэрэ хүнгэлэлтэтэй. Бидэ жэлдээ аяар 76 млн. түхэриг мүнгэ алданабди,- гэжэ Баргажан аймагай Зүблэлэй түрүүлэгшэ Зорикто Сундаров тэмдэглэнэ.
- Максимиха һууринда Байгал хамгаалха талаар хангалгын байгууламжа баригдажа байна. Энэ барилгада хэрэглэхыень аймагта 94 млн. түхэриг һомологдоо һэн. Харин энэ түсэл бэелүүлгэдэ 105 млн. түхэриг хэрэгтэй. Үшөө 10 млн. түхэриг аймагай бюджедһээ гаргашалагдаха болоно. Теэд иимэ мүнгэн манай аймагта үгы. Уласай бюджедһээ урьһаламжа үгэхэ тухай хэлэгдээ, теэд тэрэнииень бусааха хэрэгтэй, - гэжэ Зоригто Сундаров хөөрэнэ.
Аймагай һунгамалнууд нютагай бюджедэй шахардуу байдалда ороһыень тэмдэглэбэ.
