692
2017 ондо Ород гүрэнэй 7 нютаг можонуудта Москва хотын үдэрнүүд үнгэргэгдэхэ юм. Тэрэнэй тоодо Улаан-Үдэдэ июлиин 13-14-дэ энэ хэмжээ ябуулга эмхидхэгдэхэ.
Энэ хэмжээ ябуулгада дашарамдуулан, июниин 5-һаа июлиин 6 болотор онлайн- конкурс Буряад Уласта ажаһуугшадай дунда үнгэргэгдэхэ юм. Мүрысөөндэ хабаадахын тула www.днимосквы.рф гэһэн сайтда орожо, мэдүүлгэ оруулха хэрэгтэй. Тиихэдэ бүлэ бүхэнһөө гансал нэгэ хүниинь хабаадаха эрхэтэй юм.
10-15 наһа хүрэтэр үхибүүд “Нарисуй Москву” гэһэн уран зурагай, 7 наһанһаа эхилжэ, “Дни Москвы” гэһэн гэрэл зурагай болон “Стихи о Москве” гэһэн уран найрагай мүрысөөнүүдтэ, 12 наһатайһаа эхилжэ, “Московские истории” гэһэн викторинада хабаадаха аргатай. Олондо мэдээсэл тараадаг хэрэгсэлнүүдэй түлөөлэгшэдэй дунда урилдаан эмхидхэгдэхэ юм.
Мүрысөөн бүхэндэ 3 илагшадта гурбан үдэрэй туршада Москва хотоор хоёр хүнэй аяншалхаар путёвконууд барюулагдаха юм. Тиихэдэ Москва хүрэтэр самолёдоор гү, али поездоор ошохо, ерэхэ харгы, аэропортһоо гү, али түмэр замай вокзалһаа гостиница хүрэтэр, Москва хотодо байрлаха үнэ сэн путёвкодо оруулагданхай.
18 наһа хүсөөгүй конкурсдо илаһан үхибүүд Москва хүрэтэр ошоходоо, заатагүй хуулиин наһа хүсэһэн хүнэй харууһатай ябаха болоно. Үгы гэбэл, тэдэнэр конкурсын эрилтэнүүдые хүсэд дүүргэбэгүй гэжэ тоологдохо. Тиимэһээ тэдэнэй шан удаадахи хабаадагшада дамжуулагдаха юм.
