​Нюдэнһөө сэнтэй, сэсэгы юумэн бии гү?

Нюдэ эмшэлхэ талаар уран нарин аргатай, угаа ехэ эрдэм мэдэсэтэй хэн бэ гээд асуугаа һаа, Захаамин аймагай Дүтэлүүр нютагһаа гарбалтай Вячеслав Борисович Цыбиковые абаһаар нэрлэмээр лэ даа. Буряад Уласай габьяата врач, дээдэ категориин эмшэн, “Ажалай ветеран” гэһэн хүндэтэ нэрэ зэргэдэ хүртэһэн В.Б.Цыбиков республикын больницын нюдэнэй микрохирургиин таһагай дээрээ оройгүй мэргэжэлтэн зандаа аяар 35 жэлэй туршада ажаллаһаар юм. Алишье тала- араа дүрбэн тэгшэ: аргалха шадабаряараашье дээдын зэргэ, абари зангаараашье урин налархай. Түрэл аймагтаа онсо татасатай. 

- Вячеслав Борисович, нютагтаа нэмэри туһа үзүүлхэ гэжэ зүдхэжэ ябадагыетнай мэдэнэбди... 

- Мэргэжэлтын зүбшэл заабаряар туһалхаяа аймагай поликлиникэдэ зониие нилээн лэ угтан абаабди. Холын газарта ажаһуудаг хадаа хото город хүрэхэнь хүшэр, илангаяа наһатайшуулда бэрхэтэй ааб даа. Байра дээрэнь диагноз табижа, саашаа ямар эмнэлгэ гараха тухайнь заабарилжа, операци хэрэгтэй һаань, республикын больницада ээлжээндэ бэшүүлжэ оруулдагбди. Үнгэрһэн хабар Захаамин аймагай 90 жэлэй ойе угтуулан, аймагай захиргаанай толгойлогшо С.В. Гонжитовай хүтэлбэри доро 4 агитбригада байгуулжа, бүхы һууринуудай малшадта хүрөөбди. Дуу, хатарһаа гадна бэе махабадта туһатай шалгалта хэһэмнай баһал сэнтэй гэжэ һананаб. Энэ ехэ һайн үүсхэлые иигээд орхижорхингүй, саашань үргэлжэлүүлээ һаа, һайн байгаа. Малшад, таряашаднай - манай баялиг, эгээл хэрэгтэй зомнай ха юм. 

- Та өөрөө дээдэ гарай мэргэжэлтэн байхаһаа гадна дэлгэр сэдьхэлтэй эрхим һурган хүмүүжүүлэгшэ гээшэт. Танай һургаһан Дарима Владимировна Сосорова мүнөө дээрэ дурсагдагша нюдэ эмнэдэг таһагые толгойлно… 

- Тиимэ. Дарима Владимировна мүн лэ Дүтэлүүр нютаг тоонтотой юм. Нюдэнэй микрохирургиин таһагые даагша байхаһаа гадуур Буряад Уласай Элүүрые хамгаалгын яаманай ахамад штатнабэшэ офтальмолог, медицинын эрдэмэй кандидат мүн.

- Өөрынтнай хүбүүн, Евгений Вячеславович, мүн лэ мэдээжэ офтальмолог- врач болонхой. 

- Евгениин ажалай стаж 14 жэл боложо байна. Дээдэ һургуулиһаа гадуур Москва хотын Святослав Фёдоровой нэрэмжэтэ нюдэнэй микрохирургиин институт хоёр жэлэй туршада һуража дүүргэһэн юм. Манай таһагта, мүн ветерануудай госпитальдо ажаллана. Дүршэл нөөсэлжэ ябаг лэ даа, залуу мэргэжэлтэн ха юм. Наһанайм нүхэр – Алайр нютагһаа гарбалтай Розалия Жановна Улаан-Үдын 6-дахи поликлиникын врач-терапевт, Туяна басагамнай Эрхүүгэй университедтэ эмшэнэй мэргэжэлдэ табадахи жэлээ һурана.

- Угаа уһанда хаяхагүй гэжэ аймаг соогоо мэдээжэ хүтэлбэрилэгшэ ябаһан Баяжаб Бадмаевич абынтнай, багша мэргэжэлтэй Дора Зуйконовна эжынтнай заабари дам бэелһээр ха юм...

- Элинсэгэй заабари эхин һургаал гэлсэдэг бэлэй даа... Үнгэрһэн жэл эжынгээ, Дора Зуйконовнагай, “Буряадай түрүү хүнүүд” конкурсын лауреат болоходонь, угаа баярлааб. 

- Өөрөө та 2007 ондо мүн лэ иимэ хүндэтэй нэрэ зэргэдэ хүртэһэн бэлэйт... 

- Олониитэ зоной дэмжэлгээр ааб даа. Ажал тухайгаа дам хэлэбэл, шэнэ онол аргануудые эдэбхитэй хэрэглэнэбди. Ямаршье оёдолгүйгөөр, амбулаторно эрхэ байдалда зарим операцинууд хэгдэдэг болоо. Анхан гансал Эрхүү, Шэтэдэ нюдэ руу тарижа, макулодистрофи үбшэн эмшэлэгдэдэг байһан юм. Мүнөө жэл эгээ түрүүшынхеэ эндээ нэбтэрүүлжэ, өөһэдөө аргалдаг болообди. Хэрбэеэ направлени-зууршалга үгы һаа, иимэ эмнэлгэ аяар 35 мянган түхэригэй юм. Зонойнгоо тала хаража, иимэ эмнэлгэ медицинскэ полисоор, түлөөһэгүйгөөр хэнэ гээшэбди. Офтальмологуудай һуралсал, конференци эмхидхэнэбди, заримдаа можо хоорондын зүблөөнүүдыешье зарланабди. 

- Нюдэнһөө сэнтэй, сэсэгы юумэн алтан дэлхэйдэ бии юм аал? 

- Мүнөөнэй зон, бүри багаһаа эхилээд, компьютер, телефон, планшедһээ һалахаяа болёо. Нюдэеэ гамнаха гээшые мэдэхэгүй, хэрэгтэй, хэрэггүйдэшье үдэр һүнигүй шагаана. Түрэлхид, дүтын зон хүүгэдтээ ойлгуулжа, һэргылжэ, нарилжа байха хэрэгтэй гээд һануулая. 

- Вячеслав Борисович, аргаламжын ажалдаа шэнэ аргануудые нэбтэрүүлэн, сагай эрилтээр хүдэлжэ байһандатнай баясан, шэнэ амжалтануудые хүсэел даа.

Гэрэл зураг дээрэ: Вячеслав Цыбиков наһанайнгаа нүхэр Розалия Жановнатай, Евгений хүбүүнтэеэ