912
2017 оной майн 15-һаа 19 хүрэтэр Краснодар хотодо “Молодые профессионалы (WorldSkills Russia)” гэһэн Үндэһэтэйнэй 5-дахи Чемпионадай түгэсхэлэй шата үнгэргэгдэһэн байна. Энэ мүрысөөндэ 950 мэргэжэлэй тусхай һургуулинуудай оюутад болон 300 һурагшад хабаадаһан байна.
Чемпионадта Буряад Уласаа түлөөлһэн һурагшад болон оюутадтай, тэдэнэй багшанартай Толгойлогшын уялгануудые дүүргэгшэ Алексей Цыденов уулзаба. Энэ уулзалгада хүбүүд мүрысөөнэй үедэ хари гүрэнүүдэй хабаадагшадтай хамта, бага болзор соо компьютерэй хэрэгсэлнүүд болон программировани тааруулһан тухайгаа хөөрэбэ. Тэрэнэй дүнгүүдээр, Сибириин гүрэнэй телекоммуникациин болон информатикын дээдэ һургуулиин Буряадтахи таһагай инфокоммуникациин институдай оюутан Артём Матвеев “Сетевое и системное администрирование” гэһэн һалбарида 2-дохи һуури эзэлһэн байна.
Эдир хабаадагшад Артём Ефимов 32-дохи, Владислав Есаулов 19-дэхи һургуулинуудай шабинар “Сетевое и системное администрирование 14+” гэһэн һалбарида түрүүшын һуури эзэлбэ. Эдэ хүбүүд даабари дүүргэхэдээ, нэгэшье алдуу гаргаагүй.
- Мүнөө үедэ танай бэлиг шадабари ехэ хэрэгтэй. Санкт-Петербург хотодо үнгэргэгдэһэн уласхоорондын эдэй засагай форумдо хабаадаха үедөө “Ростелеком” бүлгэмэй хүтэлбэрилэгшэтэй уулзалгада таанар тухай хөөрэһэн байнаб. Энэ бүлгэм намар Улаан-Үдэдэ үнгэргэгдэхэ IT-форумдо хабаадаха . Таанарые энэ хэмжээ ябуулгада уринаб. Саашадаа дээдэ һургуулинуудта һураха, ажаллаха болоходотнай хаанашье таанадые абаха. Тиигэбэшье Буряад Уластаа үлэхыетнай дурадханаб, - гэжэ Буряад Уласай Толгойлогшын уялгануудые дүүргэгшэ Алексей Цыденов хэлэбэ.
Эдэ хүбүүдэй түрэлхидынь түрэл хотодоо хүбүүд һуралсалаа үргэлжэлүүлхэ ёһотой гэжэ тоолоно.
Алексей Цыденовтэй уулзалгын үедэ Буряадай багшанарай колледжын захирал Светлана Нимбуева багшалхы һалбарида Буряадай түлөөлэгшэд баһал үндэр амжалтануудые туйлана гэжэ хэлэбэ.Сибириин федеральна тойрогто“Хүүгэдэй сэсэрлигтэ болон эхин һургуулинуудта заалга” гэһэн һалбарида 2-дохи һуури эзэлһэн байна. Краснодар хотодо үнгэргэгдэһэн мүрысөөндэ “Хүгжэмэй болбосорол” гэһэн һалбарида 300 һуралсалай эмхинүүдэй дунда багшанарай колледж 4-дэхи һуурида хүртэбэ.
Буряад Уласай Толгойлогшын уялгануудые дүүргэгшэ Алексей Цыденов чемпионадта хабаадагшадта, тэдэнэй багшанарта, түрэлхидтэнь баяраа мэдүүлжэ, амаршалгын бэшэгүүдые барюулба.
- Бэрхэнүүдта, саашаадаа дэлхэйн чемпионадта түрүү һуури эзэлхэ зорилготойт, - гэжэ Алексей Самбуевич хэлэбэ.
2019 ондо Казань хотодо “Молодые профессионалы (WorldSkills Russia)” гэһэн дэлхэйн чемпионат үнгэргэгдэхэ. Энэ мүрысөөндэ Буряад Уласай түлөөлэгшэд хабаадаха аргатай гэжэ Болбосоролой болон эрдэм ухаанай яаманда тэмдэглэбэ.
Анна Огороднигой гэрэл зураг.
