938
Июниин 12-то Ородой Холбоото Уласай үдэр баяр ёһололой хэмжээ ябуулганууд Буряад Уласта үргэнөөр эмхидхэгдэбэ.
Энэ үдэр Улаан-Үдэ хотын ажаһуугшад болон айлшад эстрадын болон оперын дуушадай, ирагуу найрагшадай, хоорой коллективуудай бэлэглэһэн найр наада хаража баясаба. Хэдышье ааяма халуун байгаашье һаань, хүн зон баяр баясхалангай оршондо амаралтын үдэр үнгэргэбэ.
- Эсэгэ ороной хамгаалагшадай үдэр, Илалтын үдэр, Ородой Холбоото Уласай үдэр – эдэ һайндэрнүүд бидэниие нэгэдүүлнэ. Манай нютагта онсо шухаг газарнууд бии. Байгал далай, Түнхэн аймагай тала дайда болон бусадшье һонирхолтой газарнууд Ород гүрэнэй шэмэг болоно. Манай эгээл ехэ баялиг хадаа хүнүүд гээшэ, - гэжэ Буряад Уласай Толгойлогшын уялгануудые дүүргэгшэ Алексей Цыденов сугларагшадые амаршалһан байна.
Ородой Холбоото Уласай үдэр гэһэн хэмжээ ябуулгада Буряадтахи таһагай федеральна ахамад хинан харагша Сергей Ромахин, Арадай Хуралай Түрүүлэгшын орлогшо Вячеслав Ирильдеев болон Улаан-Үдэ хотын мэр Александр Голков гэгшэд баярай үгэнүүдые хэлэбэ.
Энэ үдэр 14 наһа гүйсэһэн үхибүүдтэ баяр ёһололой оршондо паспортнууд барюулагдаба. Эрхимээр һурадаг, тамиршад, олимпиада, мүрысөөнүүдтэ илаһан 40 хүбүүд , басагад энэ үдэр паспортнуудые абаһан байна.
Буряад Уласай Засагай газарай сайтһаа гэрэл зураг абтаба.
