860
Июниин 13-най мэдээгээр, 430 га талмайда гараһан ойн 16 түймэрнүүд унтараагдажа байна. Бэшүүр, Мууяын, Тарбагатай аймагуудай 200 га газарта гараһан 5 түймэр тогтоогдожо, мүнөө тэрэ сарагдана. Баргажан, Ярууна, Кабанск, Байгал шадарай, Хойто-Байгалай, Тарбагатай, Захаамин аймагуудта 230 га талмайда гараһан 11 түймэрнүүд һүжэрөө гэжэ мүнөөдэрэй бүридхэлдэ абтанхай.
Үнгэрһэн үдэрэй туршада 40 га талмайда гараһан 3 түймэрнүүд сараагдаа.
Ойн түймэрнүүдые унтараагшадай, техникын тоо олошоруулха талаар ажал ябуулагдана. Ойн харуулшад, “Үбэр Байгалай авиационно ойн харуулай баазын” парашютистнар, Онсо байдалай талаар яаманай хүдэлмэрилэгшэд, ажаһуугшад хамтадаа 396 хүн түймэр унтараалгада хабаадана. Түймэр саралгын 72 техникэ хэрэглэгдэнэ.
Үнгэрһэн үдэрнүүдэй туршада Буряад Уласай Дотоодын хэрэгүүдэй, Онсо байдалай талаар яамануудай болон Ойн ажахын агентствын хүдэлмэрилэгшэд ойдо орохые хориһон журам шалгаһан байна. Тэдэнэр дүрим эбдэгшэдые элирүүлһэн 29 протокол абаба. Жэлэй эхилһэнһээ хойшо 635 хүн административна харюусалгада татагдажа, 2418 мянган түхэригэй ялада тохогдоһон байна. Ойн түймэрэй аюултай хаһын үедэ түймэр табиһан 16 гэмтэн элирүүлэгдээ. Ородой Холбоото Уласай уголовно кодексын 261-дэхи статьягай ёһоор 30 уголовно хэрэг ябуулагдана.
Буряад Уласай газар дайдада түймэрэй аюултай хаһын онсо журам соносхогдонхой.
Онсо журамай үедэ ойдо орохо хоригдоно. Энэ дүрим эбдэһэн хүнүүд 4 мянгаһаа 5 мянган түхэриг хүрэтэр, албанай түлөөлэгшэд – 20 000-һаа 40000 түхэриг хүрэтэр, юридическэ нюурнууд – 300 мянганһаа 500 мянган түхэриг хүрэтэр ялада тохогдохо юм.
Хотонуудай, хүдөө нютагуудай газар дайдада гал түүдэг носоохо, хагда ногоо, бог шорой галдаха хоригдоно. Ойн хуулитай зохилдуулан, мэргэжэнги эмхинүүд ойн жасын газарнуудта түймэрһөө һэргылхэ зорилготойгоор гал носоохо эрхэтэй. Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай гэжэ Буряад Уласай ойн ажахын албан мэдээсэнэ. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно. Эдэ дүримүүдтэ хайша хэрэгээр хандабал, хүнүүд 3 мянганһаа 4 мянган түхэриг хүрэтэр, албанай түлөөлэгшэд 15 мянганһаа 25 мянган түхэриг хүрэтэр, юридическа нюурнууд 150 мянганһаа 250 мянган түхэриг хүрэтэр ялада тохогдохо.
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
