917
Буряад Уласта “2017 оной эрхим бүлэ” гэһэн Бүхэроссиин мүрысөөнэй уласай шата үнгэргэгдэһэн байна.
Буряад Уласай аймагуудта ажаһуудаг гэр бүлэнүүд Бүхэроссиин мүрысөөндэ хабаадаба. Тэрэнэй дүнгүүдээр Хурамхаан аймагай Сергей, Валентина Гармаевтан “Олон үхибүүтэй гэр бүлэ”, Загарай аймагай Василий, Надежда Васильевтан “Хүдөөдэ ажаһуудаг гэр бүлэ”, Ивалга аймагай Будажап, Сэсэгма Дамбаевтан “Гэр бүлэ – ёһо заншал сахигша” гэһэн номинацинуудта илаба. Тиихэдэ залуу айл Артемий Плешаков, Алла Мункуева гэгшэд “Залуу гэр бүлэ” гэжэ шатада илалта туйлаба.
Бүхэроссиин мүрысөөнэй уласай шатын илагшадые июлиин 8-да, Гэр бүлын үдэртэ дашарамдуулан үнгэргэгдэхэ баяр ёһололой үедэ шагнаха юм. Илагшадай дансануудынь Москва хотодо үнгэргэгдэхэ “Семья года” гэһэн Бүхэроссиин мүрысөөнэй эмхидхэлэй хороондо эльгээгдэбэ. Тэрэнэй дүнгүүд байгша оной намар согсологдохо.
