​Бүгэдые нэгэдүүлһэн Ород гүрэнэй баярай үдэр

Июниин 12-то Ородой Холбоото Уласай үдэртэ зорюулагдаhан баяр ёһололой хэмжээ ябуулганууд Буряадта зохёон байгуулагдаба. Улаан-Үдэ хотын ажаһуугшад болон айлшад эстрадын болон оперын дуушадай, ирагуу найрагшадай, хоорой коллективүүдэй бэлдэһэн тоглолто хаража баясаба. Ааяма халуун байгаашье һаань, хүн зон баяр баясхалангай оршондо энэ үдэр үнгэргэбэ.

- Эсэгэ ороноо хамгаалагшадай үдэр, Илалтын үдэр, Ородой Холбоото Уласай үдэр гэһэн һайндэрнүүд бидэниие нэгэдүүлнэ. Байгал далай, Түнхэн аймагай онсо харууһатай дархан газар болон бусадшье байгаалиин баялигнай Ород гүрэнэй одото шэмэг болоно. Тиихэдэ манай эгээл ехэ баялиг хадаа эндэхи хүнүүд гээшэ, - гэжэ Буряад Уласай Толгойлогшын уялгануудые дүүргэгшэ Алексей Цыденов сугларагшадые амаршалхадаа хэлэhэн байна. 

Ородой Холбоото Уласай үдэртэ зорюулһан баяр ёһололдо Буряад Уласдахи Федеральна ахамад байсаагша Сергей Ромахин, Арадай Хуралай Түрүүлэгшын орлогшо Вячеслав Ирильдеев болон Улаан-Үдэ хотын мэр Александр Голков гэгшэд баярай үгэнүүдые хэлэбэ. 

Энэ үдэр 14 наһа гүйсэһэн үхибүүдтэ баяр ёһололой оршондо паспортнууд барюулагдаба. Һурагшад, тамиршад, олимпиада, мүрысөөнүүдтэ илаһан 40 үхибүүн энэ үдэр паспортнуудые гартаа абаһан байна. 

Июниин 12-то Улаан-Үдын талмайнууд дээрэ һайндэрэй хэмжээ ябуулганууд үнгэргэгдөө. Хубисхалай талмайда хэмжээ ябуулганууд болоо. Жэшээлбэл, тамхи хаяхада туһа хүргэхэһөө эхилээд, зүбөөр хоол бариха гэхэ мэтын хүдэлөөнүүд болоо. Удаань залуушуулда зорюулагдаһан “Минии Эхэ орон – Ород гүрэн” гэһэн акци эмхидхэгдээ. Залуушуул һонирхолтой квест болон хатарай марафондо хабаадаба. Эндэ тамирта дуратайшуул бэеэ шалгажа, ГТО тушааха аргатай байгаа. 

Ехэ дэлгүүрэй дэргэдэхи сквер соо хотын поликлиникэнүүдэй болон элүүржүүлгын түбүүдэй эмшэдэй эмхидхэһэн ажал наһажаал зоной һонирхол татаһан байна. Эмшэд асуудалнуудта харюусажа, эмнэлгын гимнастика харуулба. Үшөө тиихэдэ гансал Буряад Уласай газар дэбисхэр дээрэ ургадаг эмтэй домтой ургамалнуудһаа үйлэдбэрилэгдэһэн сай, мазь олондо дурадхагдаба. 

С.Н. Орешковэй нэрэмжэтэ сэсэглигтэ үдэшын 17 сагһаа һайндэрэй программа эхилээ. Эндэ “Дивертисмент” гэһэн арадай духовой ретро-медь оркестр, “Крылатая гвардия”, “Лаккитон”, “Пелея” болон бусад зохёохы коллективүүд тоглолтодо хабаадаба. “Лейкерс” гэһэн вокально-инструментальна бүлэг олондо мэдээжэ дуунуудые онсо маягтайгаар гүйсэдхөө. 

“Юбилейный” сэсэглиг соо баярай хэмжээ ябуулганууд 16 сагһаа захалаа. Үбэр Байгалай шэмээшэгүүдэй “Семейские янтари” гэһэн хоор, “Россиянки” дуэт болон бусад арадай болон ветерануудай зохёохы бүлэгүүд тоглолтодо хабаадаба. Үдэшын 20 сагһаа Муниципальна духовой оркестр хүгжэм гүйсэдхэһэн байна. 

Энэ үдэрэй гол хэмжээ ябуулганууд Соведүүдэй талмай дээрэ эмхидхэгдээ. Үдэрэй 12 сагһаа “Бидэ танай үхибүүдбди, Ород гүрэн!” гэһэн һайндэрэй тоглолто болоо. Хүүгэд-эдиршүүлэй тамирай 18-дахи “Алтан луу” гэһэн һургуулиин ушуистнууд, хүүгэдэй-эдиршүүлэй “Аюулгүй бага наһан” гэһэн түбэй түлөөлэгшэд тайзан дээрэ гаража, бэлиг шадабарияа харуулжа, олоной һонирхол татаба. “Вдохновение”, “Веснушки”, “Потеш- ки”, “Саран Туяа” ансамбльнуудай гэшүүд ялас гэмэ тоглолто харуулба. 

Энэ үдэрэй гол хэмжээ ябуулганууд Соведүүдэй талмай дээрэ болоо. Үдэшэлэн “Бүхы гүрэн түрэ дуулана” гэһэн ехэ тоглолто болобо. Эндэ хотын суглуулагдамал хоор Бау Ямпиловай, Анатолий Андреевэй дуунуудые гүйсэдхэбэ. Оперо болон баледэй дуушад, Ород болон Буряад театрнуудай артистнууд, гадна Чингис Раднаев, Евгения Рейзвих, Дулма Сунрапова, Игорь Плотников, Мэдэгма Доржиева, Валико Гаспарян, Сэсэг Аюшеева гэгшэд тоглолтодо хабаадаба. Болбосоролой, соёлой болон спортын һалбариин түрүү хүнүүд, тэдэнэй тоодо “Буряад Уласай эрхим багша – 2017” гэһэн нэрэ зэргэдэ хүртэһэн Елена Бурдукова, дуушан, хүгжэм найруулагша Мэдэгма Доржиева, һур харбалгаар уласай ахалха һоригшо Эрдэм Жигжитов гэгшэд сугларагшадые һайндэрөөр амаршалба. 9 сагай туршада үргэлжэлһэн концерт-марафон Ородой Холбоото Уласай һүлдэ дуугаар түгэсэбэ.