Ерэн жэлэй ехэ ой

Энэ амаралтын үдэрнүүдтэ буурал хангай Захааминай ажалша малша, ангууша дархаша, уран нарин, оюун бэлигтэй арад зон олон тоото хүндэтэ айлшадтаяа түрэл аймагайнгаа 90 жэлэй ойе дээдын хэмжээндэ үнгэргэбэ.

Гарагай 7-до хэдэн мянган зон урматайгаар нээлгын баяр ёһололдо байлсаа. Зуу гаран агта хүлэгүүд “Дүрөө дээрээ” гэһэн найрай нээлгын баярай хатар нааданда һүр жабхалантайгаар хабаадаа. Аймагай бүхы нютагуудһаа моридоороо хүбүүд ерээ. Дайдын холо Далахайн зон утаатаархинтаяа, санагаархинтаяа, ёнгорбойгоорхинтоёо хамтаржа, Шара-Азаргада ерэжэ хоноод, найрта ерээ. Мүн баһа иигэжэл мэлээрхин, сагаан-морёорхин Бортодо хоноод ерээ. Харасаагаархин, үлэгшэнөөрхин гээд лэ урдаһаа баһал иигэжэ ерээ. Уряа урданайхяараа сар тэргээр – шар хүллэһэн хүнүүдэй гаража ерэхэдэ, харагшад ехээр һонирхожо харабад.

Хүдэр бэетэй хүбүүд, уян нугархай басагад – 170 хатаршад захын Захааминай дэбисхэртэ үдэһэн буряад, ород, хамниган, немец арадуудай хатарнуудые гүйсэдхэбэ. Арадуудай ажабайдалшье үргэнөөр харуулагдаа. Нютаг бүхэн заншалта гуримаараа өөр өөрын гэр-майхан татажа, уран гоёор шэмэглэжэ, айлшадаа угтаа.

Энэ ехэ найрта хүндэтэй айлшад буугаа. Буряад Уласай Арадай Хуралай Түрүүлэгшэ Ц-Д.Э Доржиев түрүүтэй арадай һунгамалнууд, Буряад Уласай Засагай газарай Түрүүлэгшын нэгэдэхи орлогшо И.М. Егоров түрүүтэй олон сайдууд, уласай ниислэл Улаан-Үдын Соведэй һунгамалнууд, Буряадаймнай бүхы аймагуудай засаг дарганууд, хүршэ Монгол Уласай Булган аймагай хүтэлбэрилэгшэд, һунгамалнууд хадата Захааминай бүгэдэ зониие халуунаар амаршалжа, бэлэг сэлэгүүдээ баряа. Онсо шалгарһан зондо гүрэнэй шагнал хайрануудта, үндэр нэрэ зэргэнүүдтэ хүртэһэн эрхимүүдтэ үнэмшэлгэ, үбсүүнэй тэмдэгүүдые барюулжа, һайн һайханиие, үндэр амжалтануудые хүсөө.

Улаан-Үдэдэхи Захааминһаа гарбалтай нютаг зоной “Хадата Захаамин – XXI” эблэл түрэл аймагтаа, нютагаархиндаа бэлэг болгон, Закаменск хотын 1-дүгээр һургуулиин урдахи сэсэглиг соо бодхоогдохо Николай Шабаевай шүлэгөөр зохёогдоһон Захааминай магтаал дууе һиилэһэн шулуун тэмдэгэй үнгэтэ түлэбые бэлэглээ. Олондо мэдээжэ уран зурааша Юрий Мандаганов энэ түлэбые зохёогоо. Энэ түлэбөөр үнэ сэнтэй шулуунууд хэрэглэгдэжэ, гантиг, хас эрдэнинүүдээр бүтээгдэжэ бэелүүлэгдэхэ.

Үшөө һонин гэхэдэ, хүүгэдэй Сурхарбаан ехэ гоёор үнгэрөө. Эндэ эрхимлэһэн эдиршүүлдэ “Түрэл Захааминдаа дуратайгаар” гэһэн түсэлөөр “Улаан-Үдэ – Закаменск” гэжэ авто-ябаган аяншалгада хабаадаһан багша-ветеранууд бэлэгүүдээ барюулаа. Эдэ ветеранууд Эсэгэ ороноо хамгаалгын Агууехэ дайнай үеын үхибүүд болоно. Тиимэһээ дайнай хүшэр хүндые эрэлхэгээр дабажа, Агуу Илалтые шэрээлсэһэн үхибүүдтэ бодхоогдохо хүшөөгэй түлэб Юрий Ёндоновичто бүтээлгэжэ, аймагайнгаа засаг дарга Сергей Гонжитовта барюулаа. Энэ хүшөө Агуу Илалтын 75 жэлэй ойдо Илалтын парк соо бодхоогдохоор хараалагданхай.

Заншалта ёһоороо Эрын гурбан наадан болон тамирай бэшэшье нааданууд хоёр үдэр соо үргэлжэлжэ, түрүүшын үдэр Мойһотодоо, хоёрдохи үдэрынь түбэй стадион дээрэ үнгэргэгдөө.

Хоёрдохи үдэртөө найр Закаменск хотын түбэй талмай дээрэ хүүгэдэй хатар наадаар эхилээ. Үндэр нэрэ зэргэдээ энэ Сурхарбаанда, тоонто нютагтаа хүртэһэн Буряадай габьяата артист Доржо Шагдуров ирагуу дуугаараа олониие баясуулаа. Эндэл “Захааминдаа дуратайб” гэһэн дурасхаалта тэмдэг нээгдээ.

Аймагайнгаа үндэр наһатай буурал сагаан таабайнарые, һаншаг сагаан төөбиинэрые аймагайнгаа байгуулагдаһаар 90 жэлэй ехэ ойгоор засаг дарга Сергей Валерьевич Гонжитов амаршалжа, хүндын шэрээдэ урижа хүндэлөө. Һая наашашье үзэгдөөгүй ехэ найр наадан – Сурхарбаан болобо гэжэ нютагайшье хүнүүд, айлшадшье ехэтэ баярлаа.

Хүндэтэй айлшад