920
2017 оной июниин 15-18-ай үдэрнүүдтэ Эрхүү можын Ойхон аймагта “Ёрдын нааданууд – 2017” гэһэн уласхоорондын үндэһэтэнэй соёлой фестиваль 6-дахияа үнгэргэгдэхэ.
Июниин 15-да Ойхон аймагта Ёрдын нааданууд гэһэн фестивалиин хэмжээндэ “Ёрдын нааданууд – Еврази түбиин нүхэсэлэй нэгэдэл” гэһэн Уласхоорондын эрдэмэй-зохёохы бага хурал эмхидхэгдэхэ юм. Тус хэмжээ ябуулга Евразиин арадуудай ёһо заншал, соёл сахин дэлгэрүүлхэ, Евразиин арадуудай соёлой болон оюун сэдьхэлэй баялиг хүгжөөхэ, ондоо яһанай арадуудта тэсэбэритэй хандаса хүмүүжүүлхэ, оюун сэдьхэлэй, бэе тамир хүмүүжүүлгын, соёл болон урлагай һалбаринуудта нютаг можо хоорондын түсэлнүүдые бэелүүлхэ гэхэ мэтэ зорилгонуудые хараална.
“Евразиин арадуудай уг залгамжын соёлой баялиг: мүнөө үедэ сахин хүгжөөлгын холын хараата түсэбүүд” болон “Үндэһэн спорт: мүнөө үеын байдал, хуули тогтоолгын үндэһэн болон хүгжөөлгын холын хараата түсэбүүд” гэһэн дүхэриг шэрээнүүд бага хуралда эмхидхэгдэхэ.
Ородой Холбоото Уласай соёл болон спортын һалбаринуудай засаг зургаанай хүтэлбэрилэгшэд, Засагай газарай болон өөһэдын хүтэлбэриин, нютагай засагай байгууламжануудай түлөөлэгшэд, эрдэмтэд, багшанар, соёл, урлагай, спортын һалбариин хүдэлмэрилэгшэд, һоригшод энэ хэмжээ ябуулгада хабаадаха.
“Ёрдын нааданууд” Facebook хуудаһанһаа гэрэл зураг абтаба.
