1117
Үнгэрһэн амаралтын үдэрнүүдтэ Захаамин аймагай байгуулагдаһаар 90 жэлэй ойн баярта зорюулагдаһан баяр ёһололй хэмжээ ябуулганууд үнгэргэгдэбэ.
Олон зоной хабаадалгатай эмхидхэгдэһэн нээлгын баяр ёһололдо арад зоной нэгэдэл, ажабайдал тухай харуулагдаа. Уян нугархай 170 хатаршад монгол, эвенк, казах болон буряад арадуудай хатарнуудые гүйсэдхөө. Һүүлээрнь захааминаархид жагсаалда зогсожо, багшын ажалай ветеранууд тэрэниие ударидаба.
Буряад Уласай Засагай газарай түлөөлэгшэд болон аймагай хүтэлбэрилэгшэд амаршалгын үгэнүүдые хэлэһэн байна. Буряад Уласай Болбосоролой болон эрдэм ухаанай сайдай уялгануудые дүүргэгшэ Баир Жалсанов 90 жэлэй ойн баяраар ажаһуугшадые амаршалжа, Захаамин аймаг бэлигтэй тамиршад, зүжэгшэд, эмшэд болон багшанараар баян юм гэжэ тэмдэглэбэ.
“Ородой Холбоото Уласай соёлой һалбариин габьяата хүдэлмэрилэгшэ” гэһэн үндэр нэрэ зэргэ Закаменск хотын “Чебурашка” гэһэн хүүгэдэй сэсэрлигэй хүмүүжүүлэгшэ Юлия Игошева, Хуртагын хүүгэдэй сэсэрлигэй даагша Анна Цыренова, Закаменск хотын “Нэмэлтэ һуралсалай түбэй” багша Альберт Манжиханов, Захаамин аймагай Болбосоролой хүтэлбэриин захиргаанай-ажахын һалбариин таһагай даагша Любовь Цыбенова гэгшэдтэ олгогдобо.
Захаамин аймагай нютагай засагай байгууламжын залуушуулай болон спортын таһагай дарга Борис Осодоев “Ородой Холбоото Уласай залуушуулые болон үхибүүдые хүмүүжүүлхэ һалбариин габьяата хүдэлмэрилэгшэ” гэһэн үндэр нэрэ зэргэдэ хүртэбэ.
Захаамин аймагай байгуулагдаһаар 90 жэлэй ойн баярта дашарамдуулан, аймагай һургуулинуудта 14 компьютернүүд болон 16 һуралсалай эд бараанай комплект дамжуулагдаха юм.
Сэнгэ Ринчиновэй гэрэл зураг.
