764
Бэшүүр аймагай Бэшүүр нютагта наранай элшын зайн галай 10 МВт хүсэнэй станциин барилга эхилээ. Энэ барилга эхилһэн мүнгэ һомологшо 1,096 млрд. түхэриг гаргашалха болоно.
2016 ондо Буряад Уласай Засагай газар “Матраевска наранай элшын зайн галай станци” гэһэн хизаарламал харюусалгатай бүлгэмтэй мүнгэ һомололгын хэлсээ баталжа, барилга эхилбэ. Ород гүрэнэй Новочебоксарск хотодо байгша оной апрель һараһаа үйлэдбэрилэгдэжэ эхилһэн наранай элшын шэнэ модульнууд энэ барилгада хэрэглэгдэхэ юм. Бэшүүрэй наранай элшын зайн галай станциин үйлэдбэрилхэ элшэ хүсэнэй хэмжээн жэлэй 14,5 ГВт*ч шахуу байха гэжэ хараалагдана.
- Мүнөө үедэ фото-зайн галай модулиин тохогдохо столнууд суглуулагдажа байна. Барилгашадай байра түхеэрэгдэнхэй, харгы заһабарилагдаа, баханануудые һуулгаха газар хэмжэгдээ. Гүнзэгы ута һубагууд малтагдажа, һуури табигдана, - гэжэ Буряад Уласай Транспортын, элшэ хүсэнэй болон харгын ажахы хүгжөөлгын талаар яаманда хэлэбэ.
Түсэбэй ёһоор 2017 оной август һарада Бэшүүрэй наранай элшын станциин барилга дүүргэгдэхэ ёһотой.
2018 ондо Гусиноозёрск хотодо наранай элшын зайн галай 15 МВт хүсэнэй хоёрдохи станци ашаглалгада оруулагдахаар хараалагдана.
