787
Буряад Уласта июниин 16-най мэдээгээр долоон ойн түймэр унтараагдажа байна. Хойто-Байгалай, Кабанск болон Хурамхаан аймагуудта 470 га талмайда 5 газарта түймэр гаранхай. Мууяын аймагта 145 га талмайда гараһан хоёр түймэр тогтоогдобо.
Ажаһуугшадай галда хайша хэрэгээр хандаһанһаа боложо, түймэрнүүд һүжэрнэ гэжэ Буряад Уласай Ойн ажахын агентствэдэ мэдээсэнэ.
Үнгэрһэн үдэрэй туршада Захаамин, Байгал шадарай, Хойто-Байгалай, Загарай аймагуудта гараһан 6 түймэр унтараагдаа. Галда хохидоһон талмай 177 га болобо. Түймэр унтараалгада 330-аад ойн харуулшад, “Үбэр Байгалай ойн харуулай авиабаазын” парашютистнар, ажаһуугшад хабаадана. Түймэр саралгын 73 техникэ хэрэглэгдэнэ. Хойто-Байгалай аймагта түймэр унтараалгада Ми-8 МТВ түхэлэй вертолёдууд хэрэглэгдэһэн байна. Хори, Хэжэнгэ аймагуудта 5-дахи классай аюулай түймэрнүүд гаранхай.
Буряад Уласай дэбисхэртэ халуун, бороогүй уларил тогтоһоһонһоо боложо, түймэр һэргылгын ажал эршэтэйгээр ябуулагдана. Ойн харуулшад үдэр бүри ойн жаса шалгахаяа гарана. Ой тайга самолёдуудаар, замбуулинһаа саг үргэлжэ шалгагдажа байна.
Буряад Уласта түймэрэй аюултай хаһын онсо байдал соносхогдонхой. Онсо байдалай үедэ ойдо орохо хоригдоно. Эдэ дүримүүдтэ хайша хэрэгээр хандабал, 4 мянгаһаа 500 мянган түхэриг хүрэтэр яла тохогдохо юм.
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
