845
Үсэгэлдэр үнгэргэгдэһэн Буряад Уласай Арадай Хуралай 5-дахи зарлалай нэгэ мандадтай һунгуулиин 16-дахи тойрогто нэмэлтэ һунгалтада, уридшалһан мэдээгээр, 49-дэхи һургуулиин захирал Людмила Попова илаба.
Буряад Уласай Һунгуулиин хороон уридшалһан дүнгүүдые толилһон байна. Энэ дансын ёһоор, “Ниитэ нэгэн Росси” намай түлөөлэгшэ Людмила Попова 16-дахи һунгуулиин тойрогто түрүүлбэ. Тэрэнэй түлөө 58,25% ажаһуугшад дуугаа үгэһэн байна.
Коммунистнуудай түлөөлэгшэ адвокат Алдар Эрдынеевтэ - 35, 23%, ЛДПР-эй түлөөлэгшэ Сергей Дорошто – 3,63% һунгагшад дуугаа үгэбэ.
16- дахи һунгуулиин тойрогто үнгэргэгдэһэн нэмэлтэ һунгалтада үсөөн зон хабаадаһан байна. Энэ тойрогто ажаһуугшадай 26 %-һээ дээшэ – 5864 хүн һунгаба. Бүхыдөө энэ тойрогто 22483 хүн ажаһуудаг гэжэ бүридхэлдэ абтанхай.
Байгша оной февраль һарада Ородой Холбоото Уласай Федеральна Суглаанай болон Федерациин Зүблэлэй гэшүүн - Буряад Уласай Засагай газарай түлөөлэгшэ, академик Арнольд Тулохоновой һайн дураараа гүрэнэй парламентhаа болиходонь, “Ариг Ус” телекомпаниин юрэнхы захирал Татьяна Мантатова тэрэнэй орондо томилогдожо, уласай парламентда депутадай hуури сүлөө болоhон байгаа гээд hануулая.Тиигэжэ Буряад Уласай Арадай Хуралда нэмэлтэ һунгалта үнгэргэгдэһэн байна. Татьяна Мантатова Федерациин Зүблэлэй газарай-эдеэ хоолой болон байгаалиин нөөсэнүүдые ашаглалгын хороондо оробо.
Анна Огороднигой гэрэл зураг.
