1025
Майн 28-һаа июниин 18 болотор Улаан-Үдын һурагшад Уласхоорондын хүүгэдэй түбэй “Түрэһэн үдэрөөршни, Артек!” гэһэн 6-дахи ээлжээндэ амарба. Тэдэнэр нютагаа ерэжэ, амаралтын үдэрнүүдые яажа үнгэргэһэн тухайгаа хөөрэжэ үгэбэ.
20-ёод можо нютагуудай 250 һурагшад хизаар ороноо шэнжэлэлгын, сэрэгэй-бэдэрэлгын отрядуудай хабаадагшад, түүхэ һонирхон шудалдаг олониитын нэгэдэлнүүдэй хүмүүжэмэлнүүд “Артек – музейн дайда хизаар” гэһэн түүхын-хизаар ороноо шэнжэлэлгын хуралдаанда хабаадаһан байна. Тиихэдээ тэдэнэртэ тусхай хэшээлнүүдые үнгэргэжэ, үхибүүдые түүхэтэ газарнуудтай танилсуулжа, өөһэдөө бэдэрэлгэ-шэнжэлэлэгын ажал ябуулхыень харуулжа, заажа үгэһэн байна. Удаань, үхибүүд эгээл һонирхолтой газарнууд тухай бэлдэжэ, бэшэ амаржа байһан үхибүүдтэ болон айлшадта экскурси үнгэргэһэн байна.
- Эдэ үдэрнүүд хэзээдэшье мартагдахагүй. Үглөөнһөө үдэшэ болотор бидэнэр, бэдэрэлгын, шэнжэлэлгын ажалнуудые ябуулжа, олон хэмжээ ябуулгануудта хабаадажа, сүлөөгүй байгаабди. Тиихэдэ манай отряд Ородой Холбоото Уласай Бобосоролой болон эрдэм ухаанай сайд Ольга Васильева, “Артек” түбэй захирал Алексей Каспржак гэгшэдтэ экскурси үнгэргөөбди, -гэжэ Улаан-Үдын 9-дэхи һургуулиин шаби Денис Маслов хөөрэбэ.
Үшөө тиихэдэ, 1940-өөд онуудай “Артек” түбэй ажабайдалтай танилсан, тэрэниие һэргээн шэнэлэлгын ажал ябуулаа. Үхибүүдтэ тэрэ үеын хубсаһа үгтэһэн байна. Тэдэнэр “Оборона Севастополя гэһэн” экскурси эмхидхэхэ бүридэлдэ, үшөө түүхэтэ газарнуудай QR-код хэжэ һураба.
- Энэ һонирхолтой үдэрнүүдые мартахаар бэшэ. Ород гүрэнэй можо нютагуудай үхибүүдээр танилсаабди, олон нүхэдтэй болообди. Эхэ оронойнгоо түүхэ һайнаар мэдэхэ болообди, - гэжэ 3-дахи гимназиин һурагша Валя Будаева хэлэбэ.
Ородой Холбоото Уласай сэрэгэй-түүхын ниитын уласай таһагай түрүүлэгшэ Михаил Харитоновой хүтэлбэри доро Буряадай гүрэнэй ехэ һургуулиин түүхын һалбариин багша Марина Цыренова болон түүхын һалбариин 4-дэхи курсын оюутан, уласай “Рысь” гэһэн бэдэрэлгын бүлгэмэй командир Александр Васюткин гэгшэд һурагшадтай хамта бэлэдхэлэй ажал ябуулһан байна. Энэ хэмжээ ябуулгын шэлэн абалгын хоёр шата хотын һургуулинуудай һурагшадай дунда эмхидхэгдээ. Түрүүшын шатада үхибүүд “Эхэ оронойм түүхэдэ минии гэр бүлын түүхэ” гэһэн эссе бэшэжэ, эгээл эрхим ажалнуудай авторнууд шэлэн абалгын 2-дохи шатада хабаадаа. Тэрэнэй дүнгүүдээр, Эхэ оронойнгоо түүхэ тон һайнаар мэдэдэг 12 үхибүүд Уласхоорондын хүүгэдэй “Артек” түбтэ уласаа түлөөлөө.
Августын 7-һоо 27 хүрэтэр “Артек” түбэй ээлжээндэ хабаадаха үхибүүдые шэлэн абаха гэжэ даабаринууд Буряад Уласай аймагуудай һургуулинуудта эльгээгдэнхэй гэжэ Александр Васюткин хэлэбэ.
Буряадай Гүрэнэй ехэ һургуулиин мэдээсэлэй албанһаа гэрэл зураг абтаба.
