​Этигэлэй хамбын номнолой суглаан үнгэргэгдэхэ

Ородой Холбоото Уласай заншалта Буддын шажанай Сангхын түб болохо Ивалгын дасанда «Хамба лама Даши-Доржо Итигэловэй гайхамшаг үзэгдэл” гэһэн эрдэмэй уласхоорондын хуралдаан үнгэргэгдэхэнь. Энэ хэмжээн 2007 онһоо эхилжэ, хоёр жэлэй нэгэ удаа эмхидхэгдэдэг юм. Мүнөө жэлһээ жэл бүри үнгэргэгдэдэг болохо гэжэ Буддын шажанай Ехэ һургуулиин захирал Дымбрыл лама мэдээсэбэ.

- Хуралдаан гурбан (ород, буряад, монгол) хэлэн дээрэ үнгэргэгдэхэ. Этигэлэй хамбын гайхамшаг үзэгдэлдэ зорюулагдан, элидхэлнүүд, һонин мэдээсэлнүүд эндэ уншагдаха юм. Этигэлэй хамбын захяануудай тайлбарилга, шэнжэлэлгэнүүд зүбшэн хэлсэгдэхэ, - гэжэ Дымбрыл лама тэмдэглэнэ.

Этигэлэй хамбын захяа айладхалнууд ахамад харуулшан Бимба ламаар дамжуулагдадаг. Бимба лама үдэр бүри Этигэлэй хамбын урда һуужа, бисалгалда орожо, захяануудыень дамжуулан абадаг. Бүхы захяа зарлигуудынь буряад хэлэн дээрэ, тэдэнииень Бимба лама Хамба лама Дамба Аюшеевтэ дуулгахадань, Хамба лама тайлбарилжа, ород хэлэн дээрэ оршуулдаг.

Буддын шажанай Ехэ хуралдаан июниин 24 – 25-ай үдэрнүүдтэ “Хамбын Хүреэдэ” үнгэргэгдэхэ. Ородой Холбооной Буддын шажанай заншалта Сангхын түлөөлэгшэд, хари гүрэнэй ламанар, эрдэмтэд, буддын шажанай ниитэ эмхинүүдэй түлөөлэгшэд хабаадаха юм.

Буддын шажанай заншалта Сангхын сайтһаа гэрэл зураг абтаба.