​Аяншалга эрхилэгшэдэй суглаан

Улаан-Үдэ хотодо Ород, Хитад, Монгол гүрэнүүдэй аяншалгын һалбаринуудай захиралнуудай 2-дохи ехэ суглаан үнгэргэгдэхэнь. Түрүүшын үдэр Ород гүрэнэй аяншалгын албанай дарга Олег Сафонов, Буряад Уласай Толгойлогшын уялгануудые дүүргэгшэ Алексей Цыденов гэгшэд хари гүрэнэй түлөөлэгшэдтэй ажалай талаар уулзалгануудые үнгэргэхэ, хэлсээнүүд баталагдаха. Үглөөдэрынь “Байкальская Гавань” гэһэн онсо хамгаалагдадаг дэбисхэр дээрэ арбан муниципальна байгуулгануудай аяншалга хүгжөөхэ арга боломжонуудтай танилсалга болохо, мүн мүнгэ зөөри шэглүүлхэ түсэлнүүд дурадхагдаха. Гурбан гүрэнэй аяншалгын захиралнуудай 2-дохи суглаанда зорюулагдаһан дурасхаалай хүшөө нээлгын баяр ёһолол үнгэргэгдэжэ, эндэ хабаадаhан хүн бүхэн Байгал далайн эрьедэ модонуудые һуулгаха юм. Буряад орон доторхи ажаһуугшадай үндэһэн соёл харуулһан Ацагат болон Десятниково һууринуудта айлшад ошохо. Энэ хэмжээ ябуулгада ехэ олон зон хабаадахаар хараалагдана. Ганса Хитад гүрэнһөө 75 хүн бүридхэлдэ абтанхай, Монголһоо – 25, мүн Ород гүрэнэй гүйсэдхэхы засагай эмхинүүдһээ, Буряад ороной, Үбэр Байгалай, Красноярскын хизаарнуудһаа болон Эрхүү можоһоо аяншалгын хэрэг эрхилэгшэд ерэхэ түсэбтэй.