831
Хитад гүрэндэ аяншалгын асуудалнуудаар үнгэргэгдэхэ уласхоорондын хуралдаанда Ородой Холбоото Уласай можо нютагуудай дунда гансал Буряад Улас аяншалгын арга боломжонуудаа харуулха болобо. Энээн тухай Буряад Уласай Толгойлогшын уялгануудые дүүргэгшэ Алексей Цыденов “Буряадай омогорхол” гэһэн эссе-мүрысөөндэ илагшадтай уулзалгын үедэ хэлэбэ.
Аяншалгын захиргаануудай уласхоорондын хуралдаан Хитад гүрэнэй Чэнду хотодо үнгэргэгдэхэ юм. Энэ хэмжээ ябуулгада 150 гүрэнүүдэй түлөөлэгшэд, тэдэнэй тоодо Ородой Холбоото Уласай Аяншалгын федеральна агентствын хүтэлбэрилэгшэ Олег Сафонов хабаадалсаха.
- Бидэ Буряад Улас тухайгаа бүхы дэлхэйдэ хөөрэхэбди, харуулхабди. Ородой Холбоото Уласые Буряад Улас энэ хуралдаанда түлөөлхэ, - гэжэ Алексей Цыденов хэлэбэ.
Хитад, Монгол гүрэнүүдэй болон Ородой Холбоото Уласай можо нютагуудай түлөөлэгшэд Буряад Уласай һонирхолтой газарнуудые, шэмээшэг болон буряад нютагуудай аяншалгын программа хаража, Байгал далайда хүрэжэ ехэтэ гайхаһан байна гэжэ Буряад Уласай Толгойлогшын уялгануудые дүүргэгшэ Алексей Цыденов тэмдэглэбэ.
Ород, Хитад, Монгол гүрэнүүдэй аяншалгын захиргаануудай түлөөлэгшэнэрэй суглаан Улаан-Үдэдэ, Байгал далайн эрьедэ июниин 21-13-най үдэрнүүдтэ үнгэрөө гэжэ һануулнабди.
Радна-Нима Базаровай гэрэл зураг.
