789
Июниин 27-ной мэдээгээр Буряад Уласай дэбисхэртэ 6,2 мянган га талмайда гараһан 50 ойн түймэрнүүд унтараагдана. Баргажан, Бэшүүр, Зэдэ, Загарай, Захаамин, Кабанск, Хурамхаан, Мууяын, Мухар-Шэбэрэй, Аха, Байгал шадарай, Хойто-Байгалай, Сэлэнгэ, Түнхэн, Хори аймагуудай газар дайдада ойн түймэрнүүд һүжэрэнхэй. 2 мянган га тухай талмайда гараһан 12 түймэрнүүд тогтоогдожо, мүнөө сарагдана. Үшөө 4,2 мянган га талмайда гараһан 39 түймэр носоһоор. Халуун бороогүй уларил тогтоһонһоо боложо, түймэрнүүд олошороо гэжэ Ойн ажахын агентство мэдээсэнэ.
Түнхэнэй дархан газарай дэбисхэртэ 200 га талмайда гараһан 9 ойн түймэр сарагдажа байна. Тэдэнэй 3-ниинь тогдоогдобо, харин бэшэниинь соробхилһоор. Бүхыдөө дархан газарта түймэр унтараалгада 70-аад хүн хабаадаана, тэдэнэй 15-ниинь “Авиа ойн харуул” эмхиин хүдэлмэрилэгшэд болоно. Джээргэнэй болон Байгалай дархан газарнуудта ойн түймэрнүүд баһал гаранхай.
Байгал шадарай аймагта 2,8 мянган га газарта гараһан ойн түймэр соробхилно. Тэрэнэй унтараалгада 180-яад хүнүүд хабаадана. Тиихэдэ энэ түймэр унтараалгада үшөө хүнүүдые хабаадуулха болон техникэ хэрэглэхэ талаар ажал ябуулагдана.
Үнгэрһэн үдэрэй туршада Буряад Уласай Бэшүүр, Зэдэ, Загарай, Захаамин, Кабанск, Хэжэнгэ, Мууяын, Байгал шадарай, Тарбагатай, Түнхэн аймагуудай 355 га талмайда гараһан 12 ойн түймэрнүүд сарагдаһан байна. Ойн түймэрнүүдые унтараалгада ойн харуулай, “Үбэр Байгалай ойн авиа харуулай баазын”, “Авиа ойн харуул” гэһэн эмхиин хүдэлмэрилэгшэд хабаадана, 250-һаа дээшэ түймэр саралгын техникэ хэрэглэгдэнэ. Онсо байдалай үедэ ойн жаса шалгахаяа 130-аад хүн гарана.
Үнгэрһэн үдэрэй туршада Буряад Уласай Ойн ажахын агентствын, Буряадтахи Онсо байдалай талаар яаманай болон Дотоодын хэрэгүүдэй яаманай хүдэлмэрилэгшэд ойдо орохые хориһон дүрим эбдэгшэдые элирүүлжэ, 22 захиргаанай протокол абаһан байна.
Буряад Уласта түймэрэй аюултай хаһын онсо байдал соносхогдонхой. Онсо байдалай үедэ ойдо орохо хоригдоно. Эдэ дүримүүдтэ хайша хэрэгээр хандабал, 4 мянгаһаа 500 мянган түхэриг хүрэтэр яла тохогдохо юм.
Хотонуудай, хүдөө нютагуудай газар дайдада гал түүдэг носоохо, хагда ногоо, бог шорой галдаха хоригдоно. Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай гэжэ Буряад Уласай ойн ажахын албан мэдээсэнэ. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно.
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
