853
Мүнөөдэр , июниин 28-да, Уран һайханай болон техническэ урлагай нөөсын “Созвездие” гэһэн түбтэ уласай модельнэ түб нээгдэбэ.
Түбэй нээлгын баяр ёһололдо Буряад Уласай Болбосоролой болон эрдэм ухаанай сайдай орлогшо Доржо Ангархаев болон Болбосоролой болон эрдэм ухаанай яаманай нэмэлтэ һуралсалай болон интернатна эмхи зургаануудай таһагай дарга Доржо Фролов гэгшэд хабаадаба.
- Энэ түбтэ шэнын, болбосоролой түрүү программанууд нэбтэрүүлэгдэжэ, туршалга гаража, саашадаа эгээл эрхим методико болон практиканууд 17 аймагуудта дамжуулагдаха. Модельнэ түбэй нээлгын баяраар сугларагшадые амарашалнаб, - гэжэ Доржо Ангархаев хэлэбэ.
Мүнөө үеын холбоо бариха хэрэгсэлнүүдэй туһаар Москва хотын Эдэй засагай Дээдэ һургуулиин болбосорол хүгжөөлгын институдай захирал Ирина Абанкина, Москва хотын “Республиканский мультимедиа центр” гэһэн федеральна эмхи зургаанай захирал Марина Ракова гэгшэд амаршалгын үгэнүүдые хэлэбэ.
Сентябриин 1-һээ эхилжэ, оньһон технологинуудаар хангагдаһан классуудта 10 наһатайһаа эхилжэ, үхибүүд өөһэдынгөө түсэлнүүдые 3D-принтер, 3D- сканер, лазер хэрэглэн бэелүүлхэ аргатай болохо юм. Тиихэдэ тэдэнэр программировани, судо-, авто-, авиамоделировани хэжэ һураха. Эндэ багшанарай мэргэжэл дээшэлүүлхэ талаар ажал ябуулагдаха.
Улаан-Үдэ хотын модельнэ түб, Баргажан, Зэдэ, Ярууна, Загарай, Захаамин, Ивалга, Кабанск, Хэжэнгэ, Хурамхаан, Хяагта, Мухаршэбэр, Аха, Байгал шадарай, Сэлэнгэ, Түнхэн, Хори аймагуудай болон Северобайкальск хотын һуралсалай нэгэ-нэгэ эмхинүүд энэ түсэлдэ хабаадаха юм.
Аймагуудай эмхинүүдтэ 1млн. 700 мянган түхэригэй түхеэрэлгэнүүд дамжуулагдаха.
Ородой Холбоото Уласай Болбосоролой болон эрдэм ухаанай яаманай эмхидхэһэн үхибүүдэй бэлиг талаан хүгжөөхэ талаар конкурсдо Буряад Улас илажа, 32,1 млн. түхэриг шанда хүртэһэн байна.
