867
Байгша оной апрелиин 28-да Байгал шадарай аймагай Черёмушки тосхондо ехэ түймэр боложо, хори гаран гэрнүүд шатаһан байна. Энэ ехэ гал аюул хагда галдаһан шалтагаанһаа болоо.
Байгал шадарай Черёмушки тосхондо түймэртэ хохидоһон хүн зондо гэрнүүд баригдажа эхилээ. Август һарын тэн болотор гэрнүүд баригдаха гэжэ Буряад Уласай Ниигэмэй хамгаалгын яаманда мэдээсэбэ.
Гай тодхорто гэр байраяа алдаһан Черёмушки тосхоной ажаһуугшад гэрнүүдые барижа орохо гү, али худалдан абаха гү гэжэ шиидхэбэри абажа, мүнгэн туһаламжа тэдэнэртэ үзүүлэгдэхэ юм. 19 бүлэнүүдэй 15-ниинь гэр бариха, 4-ниинь бэлэн гэр худалдан абаха гэһэн хэлсээ баталба.
Онсо байдалай талаар яаман үдэр бүри гэрэл зураг, видеобуулгабаринуудые хэжэ, гэрнүүдэй барилга шалгана.
Байгал шадарай аймагай захиргаан Черёмушки тосхоной авжаһуугшадта туһа хүргэжэ байдаг. Н.А.Семашкын нэрэмжэтэ Уласай клиническэ больницын эмшэд тосхоной ажаһуугшадай бэеын тамир шалгаа.
“Һаадгүй оршонтой ниигэм” тэргээр ябадаг эрэмдэг зоной Уласай олониитын жасын счётдо Буряад Уласай ажаһуугшад болон эмхи зургаануудһаа мүнгэн туһаламжа ороһоор.
Ородой Холбоотой Уласай Юрэнхылэгшэ Владимир Путинтай Алексей Цыденов майн 2-то сэхэ холбоо барижа, түймэрэй хойшолонгуудай усадхалга тухай хөөрэһэн байна. Тиихэдэ Владимир Путин Буряад Улас ерэжэ, шэнээр баригдаһан гэрнүүдые шалгаха тухайгаа хэлээ һэн.
