844
Буряад Уласай хүн зоной тоо 2017 оной январиин нэгэнэй байдалаар 984,1 мянган хүн гэжэ тоологдоно. Хото городто ажаhуудаг зоной тоо хадаа – 579,7 мянга, хүдөө сомонуудта 404,4 мянган хүн ажаhууна.
2016 ондо манай уласта 16109 хүн мүндэлжэ түрэhэн hаань, нүгшэhэн хүнэй тоо 11046 болоно, тиимэhээ хүн зоной юрэнхы ургалта 5063 хүн болоно.
Манай уласай хүн зоной бүридэлгые наhанай хэмжүүрээр хубаажа харабал, 25-hаа 29 хүрэтэр наhанай залуушуул тон олон – 87, 8 мянган зон ажаhууна, хоёрдохи hуурида 30-hаа 35 хүрэтэр наhатайшуул ажаhууна, тэдэнэй тоо - 85,5 мянган хүн, гурбадахи hуурида 83,9 мянган хүн 0 - 4 наhан хүрэтэр эдир эрхэтэд ажаhууна. Тоогой талаар тон бага наhанай бүлэгүүдые тоолобол: 65-hаа 69 хүрэтэр наhатайшуул – 37, 2 мянган хүн, 45-hаа 49 хүрэтэр – 53, 1 мянган хүн, 15-hаа 19 хүрэтэр – 53,4 мянган хүн.
2016 ондо Буряад Уласта 5649 шэнэ гэр бүлэ бии болоо гэжэ дансалагдаhан hаа, харин үбгэ һамганай hалаһанай тоо хадаа 3575 хүрэбэ. Энээнhээ урда жэлнүүдтэ hалаһанай тоо ехэ байгаа: 2014 ондо – 4571 ушар, 2015 ондо - 3600 ушар. Тиимэhээ 2016 ондо гэр бүлын hандаралга урда жэлнүүдтэй сасуулхада, 21 процентээр үсөөрөө гэжэ тэмдэглэмээр байна.
Хүнэй наhа адаглажа харабал, бүhэтэйшүүлэй дунда наhан 63,7 жэл, харин эмэгтэйшүүлэй наһан – 74,5 гээд тоологдоно. Наhа бараhан зоной тоо 11046 гэжэ дээрэ хэлэгдээ. Хэды хүн ямар шалтагаанhаа боложо наhа барааб гэжэ хараха болоо hаа, иимэ: элдэб янзын халдабарита үбшэнгүүдтэ нэрбэгдэн 230 хүн, хүндэ үбшэндэ дайрагдажа – 1727 хүн, һудал-шуhанай үбшэнhөө боложо – 4640 хүн, уушханай үбшэнhөө боложо – 661, хото гэдэһэнэй үбшэндэ нэрбэгдэжэ – 671 хүн наhа бараа. Харин гадаадын шалтагуудhаа боложо, олоор энэ наhатаяа хахасаhан ушарнууд байна: гэнтын архиин хорлолгоhоо – 215 хүн, элдэб янзын харгын унаагай усалнуудhаа гэмтэжэ – 174 хүн, гэнтын уhанда орожо шэнгэлгэhээ – 68 хүн, ами наһандаа гар хүрэһэн – 466 хүн, алалгаhаа – 193 хүн наhа бараhан байна.
Уласхоорондын нүүдэлэй талаар хаража үзэбэл, 2016 ондо манай улас дотор 966 хари гүрэнэй эрхэтэн орожо ерэһэн байна, харин манай уласhаа 473 хүн гаража ошоо. Тон ехэ хүн зон Украина, Узбекистан, Армени, Азербайджан уласуудһаа нүүжэ ерээ гэжэ миграционно хэрэгүүдэй хороон тоосоһон байна. Манай уласhаа гаража ошоhон зоной тон олониинь гэхэдэ, Украина, Узбекистан, Киргизи, Армени, Азербайджан болоно.
Автор: Намжилма ЦЫДЕНОВА
