​Загастайн дасанай бадар хандиб үргэлжэлһөөр

Түбэд эмнэлгын “Наран” клиникын хүтэлбэрилэгшэ Светлана Галсановна Чойжинимаева, тэрэнэй эжы, Надежда Чагдуровна Чойжинимаева, Загастайн дасан һэргээхэ дэмбэрэлтэй үүсхэл 2012 ондо гаргаа бэлэй. 

Тиин барилгын хүдэлмэри эршэтэйгээр ябуулагдажа, Бандида Хамба лама Дамба Аюшеев түрүүтэй буряад дасангуудай шэрээтэнэр, ламанар 2014 оной сентябриин 13-да Загастайн дасанай Сахюусан дуганай арамнай үргэһэн байгаа. Тэрэ гэһээр үнгэрһэн саг соо Загастайн дасан ойро шадархи нютагуудай, мүн бүхыдөө Сэлэнгэ аймагай зоной дунда Бурхан шажан дэлгэрүүлхэ талаар үлзы дэмбэрэлтэй ажал амжалтатайгаар ябуулһан зандаа. 

Һаяшаг тус дасанда болоһон Доншод хуралай гурбадахи үдэрынь, Һама Сахюусанай хуралай үедэ, жиндагуудай бадар хандибай марафон үүсхэгдээ. Ороһон үргэлэй мүнгэн Загастайн дасанай Согшон дуганай барилгада шэглүүлэгдэхэ юм.

- Манай дасанай приходто ородог Тохой, Жаргаланта, Һүтэй, Харганаа һууринуудай хүн зон, мүн Улаан-Үдэ, Гусиноозерск хотонуудта, ондоо тээгүүршье һуудаг тус дасанай жиндагууд хандиб оруулха ябадалда эдэбхитэйгээр хабаадаа, - гэжэ тус дасанай Зоригто ламбагай (Эрдынеев) мэдээсэбэ. – Тусхайлбал, С. Чойжинимаева, Д. Матханова, М. Человечкин, В. Каргин, Д. Логвиненко, А. Калашников, Этигэлэй Хамбын Эрдэнитэ Бэе харууһалагша Бимба лама, А. Будажапов, Н. Цыренов, Ц. Базаров, С. Дашинимаев, Д. Номоев, А. Старожилов, О. Сандаков, Е. Щербань, А. Бальчинов, Т. Тухалов, А. Дансарунов, Б. Будажапов, Н. Милова, А. Алтухов болон бусад ехэхэн хандибуудые оруулаа. Жэшээнь, Дарима Матханова октябрь һара хүрэтэр һара бүхэндэ 108 мянган түхэриг оруулжа байха. Гусиноозерскын ГРЭС-эй юрэн- хы захирал М.Ю. Человечкин үйлэдбэриингээ зүгһөө 1 сая түхэриг оруулхаар найдуулаа. Сэлэнгэ аймагай бусад дасангуудһаа, хуули сахилгын, гүрэнэй эмхи зургаануудһаа үргэлнүүд хэгдэбэ. Энэмнай Согшон дуганай барилгада зорюулагдаһан бадар хандибай түрүүшын шата болоно. Бүхыдөө энэ барилгада 19 миллион түхэриг хэрэгтэй болохо юм. 

Бадар хандибай ябажа байха үедэ Сэлэнгэ аймагай уран бэлигтэнэй ехэ тоглолто болобо. Ородой Бурхан шажанай Сангхын эмхидхэдэг “Эхэ хэлэн – манай баялиг” урилдаанда оло дахин түрүүлһэн Жаргалантын дунда һургуулиин бүлэг шабинар Этигэлэй хамбын магтаал эбтэй һайханаар гүйсэдхэбэ. Можо нютагууд хоорондын “Байгалай мүнгэн хоолой” урилдаанай Гран-при шанда нёдондо намар хүртэһэн, Харганаа нютагай Дугар Бадмажапов, Гусиноозерскын Арина Габитова, Загастайн дунда һургуулиин багшанарай бүлэг гоё һайхан дуунуудаараа баясуулаа.

Бадар хандиб энэ үдэрэй хэмжээ ябуулгаар хизаарлахагүй. Дүрбэн тээшээ үүдэтэй Мандалай түхэлтэй Согшон дасанай һуури нёдондо намар татагдаа юм. Барилгада мүнгэн үшөөл хэрэгтэй болохо. Тиимэһээ Загастайн дасанай, юрэнхыдөө, Буряадай бусад дасангуудай хүндэтэ жиндагуудые дэмбэрэлтэй энэ хэрэгтэ хандибуудаа үргэхэ буянта ябадалаа үргэлжэлүүлхыетнай уряалнабди.