​Олон гэр бүлэдэ туhа хүргэнэ

2010 онhоо «Олондо хабаатай хэлсээнэй бэшэг» («Социальный контракт») гэhэн программада 900 гаран гэр бүлэнүүд хабаадаа.

Жэл бүри тус програмада хабаадаhан бүлэнүүд олон болоно. 2014 онhоо 2017 он болотор 318 гэр бүлэ хабаадаа. Тэдэнэй хубиин хамhабариин ажахыда мүнөө 578 толгой эбэртэ бодо мал тоологдоно.

Буряад Уласай бүхы аймагуудай олон хүүгэдтэй, зөөри багатай гэр бүлэнүүд үхэр мал абаха арга боломжотой болоно. Үбhэ сабшаха газартай, үхэр малай байратай байгаал hаа, программада хабаадаха аргатай юм. Хэлсээнэй ёhоор программада хабаадагша түрүүшынгээ түл ондоо ядуу байдалтай айлда үгэхэ ёhотой, саашадаа бэшэ толгойнуудынь өөрынь болохо. Тиигэжэ 2017 оной түрүүшын зургаа hарын туршада 108 гэр бүлэ түлнүүдээ ондоо бүлэнүүдтэ үгэбэ. Жэлэй хоёрдохи хахадта 27 толгой зөөри багатай айлнуудта дамжуулагдаха гэжэ түсэблэгдэнэ.

«Олондо хабаатай хэлсээнэй бэшэг» программын хэмжээндэ гэр бүлэнүүд малай тэжээл, тахяа шубуу болон хүдөө ажахын техникэ худалдажа абаха, мүн огородой ажахы эрхилхэ, зүгынүүдые үдхэхэ зорилготой мүнгэн туhаламжада хүртэхэ аргатай.