839
Баргажан аймагай Максимиха тосхондо июлиин 21-25-най үдэрнүүдтэ буряад хэлэ шудалха лагерь ажалаа ябуулха. “Буряад Уласта буряад хэлэ сахин хүгжөөхэ” гэһэн гүрэнэй программаар эмхидхэгдэхэ энэ хэмжээ ябуулгада ахамад классуудай үхибүүд хабаадаха юм.
Буряад Уласай ахамад классуудай һурагшадые буряад, монгол шэнжэлэл хэжэ һургаха талаар оюутад, залуу эрдэмтэдые нэгэдүүлжэ, залан хүтэлбэрилгын ажал ябуулха гэһэн зорилгонууд энэ хэмжээ ябуулгада бэелүүлэгдэхэ юм. Лагериин хэмжээндэ уран зохёол болон хэлэн тухай эрдэмүүдээр тусхай һургуулинууд эмхидхэгдэхэ. Монголой эрдэмтэд лекци болон практическа хэшээлнүүдые үнгэргэхэеэ уригданхай.
Буряад Уласай Арадай поэт Николай Дамдиновой 85 жэлэй ойдо зорюулагдаһан “Уран гуурһан” гэһэн уран зохёолой уласай мүрысөөндэ, буряад хэлэ болон уран зохёолоор Бүхэроссиин олимпиадын уласай шатада илагшад, дунда һургуулинуудай ахамад классуудай шабинар Байгал далайн эрьедэ эмхидхэгдэхэ хэмжээ ябуулгада хабаадаха.
“Шэдитэ биирэ”, “Уран үгэ”, “Жэгүүртэ хүлэг”, “Урагшаа” гэһэн һалбаринуудаар лагериин ажал ябуулагдаха. Тиихэдэ хабаадагшад хуушан монгол бэшэг шудалха, буряад хэлэн дээрэ хөөрэлдэхэ, зохёохы бэлиг шадабарияа мүлижүүлхэ болон сүлөө сагаа гуримшуулжа, хүтэлбэрин талаар һураха юм.
Радна-Нима Базаровай гэрэл зураг.
