867
Ородой Холбоото Уласай Баталан хамгаалгын яаманай Сэрэгэй саг үргэлжын бүрилдэлэй гол хүтэлбэриин комисиин түрүүлэгшэ, полковник Игорь Держко мүнөөдэр Улаан-Үдэ албанай хэрэгээр ерэбэ.
Буряад Уласай Болбосоролой болон эрдэм ухаанай яаманай сайдай уялгануудые дүүргэгшэ Баир Жалсанов, Зүүн Сибириин гүрэнэй технологиин болон хүтэлбэриин ехэ һургуулиин захирал Владимир Сактоев, Буряадай сэрэгэй комиссириадай болон сэрэгэй түлөөлэгшэд Игорь Держкотой хамта зүблөөндэ хабаадабад. Тиихэдээ Зүүн Сибириин гүрэнэй технологиин болон хүтэлбэриин ехэ һургуулида сэрэгэй кафедра байгуулха тухай тэдэнэр зүбшэн хэлсэбэд.
- 2017 оной март һарада Ородой Холбоото Уласай Баталан хамгаалгын яаманда үнгэргэгдэһэн зүблөөндэ Сергей Шойгу зүүн зүг руу шэглэхэ тухай хэлэһэн байна. Тиимэһээ Улаан-Үдэ, Петропавловск-Камчатский болон Шэтэ хотонуудай ехэ һургуулинуудта сэрэгэй кафедра байгуулха талаар ажал ябуулнабди, - гэжэ Игорь Держко хэлэбэ.
1967 онһоо 2008 он болотор Зүүн Сибириин гүрэнэй технологиин болон хүтэлбэриин ехэ һургуулида сэрэгэй бэлэдхэл оюутад гарадаг байгаа. Тиихэдэ 16 мянганһаа дээшэ офицернүүд эндэ һуража, 7 мянганһаа дээшэ зониинь сэрэгэй алба гараһан байна. Сэрэгэй кафедра дүүргэгшэдэй дунда 5 генералнууд, 80-яад полковнигууд, 9 мянганһаа дээшэ ахалагша офицернүүд бии. Тэдэнэй дунда СССР-эй болон Ородой Холбоото Уласай орден, медальнуудаар шагнагдаһан эрэлхэг баатарнууд олон. Сэрэгэй кафедра байгуулха ехэ һургуулида материальна-техническа бааза, энэ һалбарида заажа байһан багшанар, профессорнууд бии. Тиимэһээ Зүүн Сибириин гүрэнэй технологиин болон хүтэлбэриин ехэ һургуулида сэрэгэй кафедра һэргээхэ шиидхэбэри абтаһан байгаа гэжэ Баир Жалсанов тэмдэглэбэ.
2017 оной августын 30-да Владимир Сактоев Ородой Холбоото Уласай Баталан Хамгаалгын яаманда сэрэгэй кафедра байгуулха талаар ехэ һургуули тухайгаа харуулха, хөөрэхэ юм. Энэ асуудалаар зохихо шиидхэбэриин абтабал, 100-аад залуушуул сэрэгэй бэлэдхэл гараха аргатай болохо юм.
