​Нэмэлтэ һуралсалда - тусхай анхарал

Һуралсалай ерэхэ жэлһээ Буряад Уласта нэмэлтэ һуралсалда анхарал бүри ехээр хандуулагдадаг болохонь. Ушарынь юуб гэхэдэ, энэ һалбари хүгжөөлгын талаар Ород гүрэн доторхи түрүү нютаг можонуудай тоодо манай Буряад орон оролсоно. 

Үшөө 2016 ондо Ородой Холбоото Уласай Юрэнхылэгшэ Владимир Путин нэмэлтэ һуралсалаар һурагшадай 75 процент хангагдаха ёһотой гэһэн заабари үгэһэн байна. Тус даабари дүүргэхын түлөө Ородой Холбооной Болбосоролой болон эрдэм ухаанай яаман нэмэлтэ һуралсал хүгжөөхэ талаар тусхай түсэл зохёожо, можо нютагуудаар эльгээгээ. Тус яаманай үнгэргэһэн конкурсдо Буряад Улас илалта туйлажа, энэ түсэл нэбтэрүүлхэ Ородой 9 можо нютагуудай тоодо оролсобо. Тиигэжэ манай уласта энэ хэрэг бэелүүлхын тула 32 сая түхэриг дамжуулагдаха. 

Буряад Уласай Болбосоролой болон эрдэм ухаанай яаманай таһагые даагша Доржо Фроловой хэлэһээр, үхибүүд секци болон кружогуудта шэнэ юумэнтэй танилсаха аргатай болохо. Мүн тиихэдэ нэмэлтэ һуралсалай эмхи зургаануудта хүдэлдэг багшанар өөһэдөө дүй дүршэлөө дээшэлүүлхэ байна. 

Энэ холын хараатай түсэлэй ашаар үшөө нэгэ орёо асуудал шиидхэгдэхэ болоно. Юуб гэхэдэ, һүүлэй үедэ һургуули дүүргэгшэд ехэнхидээ гуманитарна, экономическа болон юридическэ шэглэлэй мэргэжэлнүүдые шэлэн абана. Тиихэдэ техническэ, ажалай талаар мэргэжэлнүүдээр үсөөн зон hурахаяа ороно.

- Маанадта үгтэһэн 32 сая түхэригтэ робот, самолет болон онгосо бүтээлгын, электроникын оньһон техникэ, станогууд, тиихэдэ мүнөө сагай эрилтэдэ таарама 3Д принтернүүд ба 3Д сканернууд худалдажа абтаха. Тэдэниие хэрэглэн, уласай 17 хүдөө аймагуудай болон Улаан-Үдэ хотын һурагшад хүдэлхэ, нэмэлтэ һуралсал гараха, - гэжэ “Созвездие” гэһэн ресурсна түбэй захирал Наян Сагаев хөөрэнэ. 

Шэнэ гуримаар нэмэлтэ һуралсал гараhан хүбүүд, басагадта хубиин электронно үнэмшэлгэнүүд барюулагдаха. Наян Сагаевай хэлэһээр, бүхы аймагуудта энэ ажал хинан шалгагдаха. Тус ажал гуримшуулхын түлөө “Созвездие” эмхиин дэргэдэ модельнэ түб байгуулагдаа.