​Һургуули дүүргэгшэд ерээдүйгөө шэлэнэ

Мүнөө жэлдэ Буряад Уласай һургуулинуудые 5 мянга 400 гаран үхибүүд дүүргэжэ, ажабайдалай үргэн харгыда гараба. Бусад жэлнүүдтэ орходоо, энэ бага тоо гээшэ. Гэбэшье хэзээ хэзээнэйхиһээ олон медальнуудые һурагшад абаба. Мүн гүрэнэй ниитэ нэгэ шалгалтада 100 балл абагшадай тоо баһа олошороо.

Буряад Уласай Болбосоролой болон эрдэм ухаанай яаманай мэдээсэһээр, хойто жэлдэ һургуули дүүргэгшэдэй тоо нэгэ мянгаар нэмэхэ ёhотой. Энэ жэлэй сентябриин 1-дэ дунда һургуулинуудай богоһо аяар 16 мянган багашуул алхажа орохонь. Тиимэһээ 10 жэл болоходо, һургуули түгэсхэгшэдэй тоо эрид дээшэлхэ юм. 

2017 ондо 350 гаран хүбүүд, басагад эрхимээр һураһанай түлөө медальнуудые абаа. Ганса Улаан-Үдэ хотын 232 һурагша иимэ шагналтайгаар һуургуулияа дүүргээ. 35-дахи дунда һургуулиин шаби Галина Быкова информатикаар 100 балл абаа. Мүн 65-дахи һургуули дүүргэгшэ Сергей Семушев физикээр шалгараа. Буряад ороной үхибүүд ород хэлэ тон һайнаар мэдэдэг байна гэжэ шалгалтанууд харуулаа. Тиигэжэ аяар 34 хүн 100 балл, 1033 хүбүүд, басагад 80-99 балл абаа. 

Буряад Уласай Болбосоролой болон эрдэм ухаанай яаманай сайдай уялгануудые дүүргэгшэ Баяр Жалсановай тэмдэглэһээр, түрэлхидэй болон багшанарай ашаар үхибүүд ехэ оролдосотойгоор хүдэлөө. 

- Манай уласай hурагшад шалгалтануудые hайнаар тушааха арга боломжонуудтай байһанаа дахинаа гэршэлбэ, - гэжэ Баяр Жалсанов хөөрэнэ. - Улаан-Үдэ хотын, Хори, Хэжэнгэ, Хурамхаан, Баргажан, Зэдэ, Байгал шадарай, Бэшүүр болон Хяагта аймагуудай һургуули дүүргэгшэд һайн дүнгүүдые харуулаа. 

Улаан-Үдэ хотын 60-дахи һургуули дүүргэһэн Карина Крамаренко ерээдүйдэ хирург болохо һанаатай. Эрхимээр һураһан энэ басагандал адли үшөө олон үхибүүд ондоо тээшээ ошожо hураха түсэбтэй. Шалтагааниинь гэбэл, эндэхи дээдэ һургуулинууд иимэ мэргэжэлтэдые бэлдэнэгүй. Энэ болон бусад шалтагаануудhаа уламжалан, хэды үхибүүд түрэл нютагтаа һурахаа үлэхэнь хаб? 

Һүүлэй мэдээгээр, Улаан-Үдын дүрбэн дээдэ һургуулинууд оюутадые шэлэн абажа эхилэнхэй. Буряадай гүрэнэй университет 1200 бюджетнэ һуурида оюутадые абаха түсэбтэй. Юридическэ болон экономическа һалбаринуудта эгээл олоор хүн ороно гэжэ тэмдэглэхээр. Зүүн Сибириин гүрэнэй технологиин болон хүтэлбэриин университет 600 хүнүүдые түлөөһэгүйгөөр һургахаар абаха байна. Энэ жэлдэ хүдөө ажахын академидэ 600, соёлой академидэ 300 бюджетнэ һуури хараалагданхай. 

Мүнгэ түлэжэ, үхибүүгээ һургаха түрэлхидтэ хүндэшэг байха гээд һанагдана. Юуб гэхэдэ, зарим мэргэжэлдэ һурахын түлөө тон бага хэмжээень абабал, жэлэй 30 мянган түхэриг тэдэ гаргаха болоно. Тиихэдэ хэдэн мэргэжэлнүүдтэ жэлэй 150 мянган түхэриг хүрэтэр түлэхэ хэрэгтэй. Жэшээнь, физкультурын багша болохын түлөө жэлдээ 151 мянган түхэриг түлэхэ болоно. 

Мүн тиихэдэ мэргэжэлэй дунда һуралсалай эмхи зургаануудта оюутадые шэлэн абалга баһа түлэг дундаа.