850
Бэшүүр аймагай Бэшүүр тосхондо наранай элшын зайн галай станциин барилга түлэг дундаа. 10 МВт хүсэнэй зайн галай станци барилгада 1,096 млрд. түхэриг һомологдохо гэжэ Буряад Уласай Транспортын, элшэ хүсэнэй болон харгын ажахы хүгжөөлгын яаманда мэдээсэбэ.
“Мүнөө долоон хоногто зайн галай станциин модульнуудай хабсаралга эхилбэ. Баханануудые һуулгажа, модульнуудай тодхогдохо шэрээнүүд хабсаргагдажа, барилгашадай байра түхеэрэгдэжэ, харгы заһабарилагдаһан байна. Тиихэдэ кабель татагдана, барилгын бусад ажалнууд хэгдэнэ”, - гэжэ Буряад Уласай Транспортын, элшэ хүсэнэй болон харгын ажахы хүгжөөлгын яаманда мэдээсэнэ.
Бэшүүрэй наранай элшын станциин барилга 2017 оной август һарада дүүрэхэ гэжэ түсэблэгдэнхэй.
2016 ондо Буряад Уласай Засагай газар “Матраевын наранай элшын зайн галай станци” гэһэн хизаарламал харюусалгатай бүлгэмтэй мүнгэ һомололгын хэлсээ баталжа, барилга эхилбэ. Ород гүрэнэй Новочебоксарск хотодо байгша оной апрель һараһаа үйлэдбэрилэгдэжэ эхилһэн наранай элшын шэнэ модульнууд энэ барилгада хэрэглэгдэхэ юм. Бэшүүрэй наранай элшын зайн галай станциин үйлэдбэрилхэ элшэ хүсэнэй хэмжээн жэлэй 14,5 ГВт*ч шахуу байха гэжэ хараалагдана.
2018 ондо Гусиноозёрск хотодо хоёрдохи наранай элшын зайн галай 15 МВт хүсэнэй станци ашаглалгада оруулагдахаар хараалагдана.
