819
Буряад Уласай Толгойлогшын уялгануудые дүүргэгшэ Алексей Цыденовэй 2017 оной июлиин 19-нэй 139-дэхи тогтоолоор Баргажан, Захаамин, Хурамхаан, Тарбагатай, Мууяын, Байгал шадарай, Хойто-Байгалай аймагуудта болон Северобайкальск хотодо ойн түймэрнүүд унтараагдажа, түймэрэй аюултай хаһын онсо байдал болюулагдаба.
Үнгэрһэн үдэрэй туршада Ярууна аймагта 4 га талмайда һүжэрһэн түймэр ойн харуулшад унтарааһан байна.
Июлиин 20-ой мэдээгээр, Кабанск, Зэдэ аймагуудта Байгалай дархан газарта 2,4 мянган га талмайда ойн түймэр сарагдана. Ойн харуулшад, “Үбэр Байгалай авиационно ойн харуулай” болон “Авиа ойн харуул” федеральна эмхи зургаанай парашютистнар болон ажаһуугшад дүрэжэ байһан ой унтаргаана. Түймэр саралгын 42 техникэ хэрэглэгдэнэ.
Буряад Уласай Бабанта, Бэшүүр, Зэдэ, Ярууна, Загарай, Ивалга, Кабанск, Хэжэнгэ, Хяагта, Мухаршэбэр, Аха, Сэлэнгэ, Түнхэн, Хори аймагуудта түймэрэй аюултай хаһын онсо байдал соносхогдонхой. Онсо байдалай үедэ ойдо орохо хоригдоно. Эдэ дүримүүдтэ хайша хэрэгээр хандабал, 4 мянганһаа 500 мянган түхэриг хүрэтэр яла тохогдохо юм.
Хотонуудай, хүдөө нютагуудай газар дайдада гал түүдэг носоохо, хагда ногоо, бог шорой галдаха хоригдоно. Тала дайдаар хагда, поли дээрэ үлэһэн ногоо галдаха, гал түүдэг носоохо хорюултай гэжэ Буряад Уласай ойн ажахын албан мэдээсэнэ. Үшөө тиихэдэ, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно.
Түймэрэй гараһан тухай дүтын ойн ажахын албанда гү, али (83012) 20-44-44 гэһэн утаһаар дуулгажа байгыт гэжэ ойн харуулшад мэдүүлнэ.
