​Тэдхэбэриин жасын туһаламжа мүнгэн

Буряад Уласай интернат-байшангуудай барилга болон заһабарилгада Ородой Холбоото Уласай Тэдхэбэриин (Пенсиин) жаса 26 гаран сая түхэриг мүнгэ һомолхонь. 

Мухар-Шэбэртэ интернат заһаха 

Гүрэнэй Тэдхэбэриин (Пенсиин) жасын Буряад Уластахи таһагай хэблэлэй албанай мэдээсэһээр, 2017 ондо энэ мүнгэнэй ехэнхи хубинь сэдьхэлэй үбшэндэ нэрбэгдэһэн зоной байрладаг Мухар-Шэбэрэй интернадай хамтын байрын байшанай барилгада гаргашалагдахаар хараалагданхай. Ниигэмэй талаар хүн зониие хангадаг манай уласай эмхинүүдэй ажахын-техническэ баазануудые бүхэлхэ талаар тусхай программануудые бэелүүлгэдэ Тэдхэбэриин жасын бюджедһээ 25 гаран сая мүнгэн һомологдохо. 

Сэдьхэлэй үбшэндэ нэрбэгдэһэн зоной байрладаг Мухар-Шэбэрэй интернадай хамтын байрын байшанай барилгада дүн хамта 55 гаран сая түхэриг мүнгэн гаргашалагдаха юм. 30 гаран сая түхэригынь Буряад Уласай мүнгэн санһаа үгтэхөөр түсэблөөтэй. Шэнэ байшанай баригдахада, медицинын тусхай туһаламжада хүртэхэ болон эмнэлгын һүүлээр бэеэ олохо гүүлэһэн үшөө 50 хүниие энэ эмхи угтан абаха аргатай болохо. 

Энээнһээ гадна, Тэдхэбэриин жасын гаргашалха мүнгэнһөө 990 мянган түхэригөөр “Хүн зониие ниигэмэй тэдхэмжэнүүдээр хангадаг Улаан-Үдэ хотын “Этигэмжэ” түбэй хамтын нэгэ байра һэльбэн заһабарилагдаха юм. 1971 ондо баригдаһан тэрэ байшан газаа талаһаа дулаалагдахаар болонхой. Энээнһээ урид мүн лэ Тэдхэбэриин (Пенсиин) жасын мүнгөөр энэ байшан соохи таһалганууд, эдеэ хоол бариха газарынь досоо талаһаа заһабарилагдажа, болбосон түхэлтэй болгогдоод, энэ түбтэ байрладаг зондо таатай зохид болоо юм. 

Наһатайшуулые компьютерта һургаха 

Ажаллахаа болиһон тэдхэгдэгшэдые (пенсионернүүдые) компьютер дээрэ хүдэлжэ һургаха талаар тусхай һуралсал эмхидхэхэ түсэл Пенсиин жасын ниигэмэй программануудта 2015 ондо бии болоһон байгаа. Энэ түсэлдэ 2017 ондо Ородой Холбоото Уласай Тэдхэбэриин (Пенсиин) жасын мүнгэн санһаа 320 мянган түхэриг һомологдохоор түсэблэгдэнэ. Тэдхэгдэгшэд (пенсионернүүд) компьютер дээрэ, интернет соо ганса хүдэлжэ һураха бэшэ, харин гүрэнэй электронноор дурадхагдадаг хангамжануудые хэрэглэжэ шададаг болохо юм. Албан зургаанууд хоорондын харилсаанай дүримэй ёһоор, энэ мүнгэн уласай Хүн зониие ниигэмэй талаар хамгаалгын яаманаар гаргашалагдаха болоно. Байгша ондо энэ яаман хүдэлхэеэ болиһон 159 тэдхэгдэгшые (пенсионерые) компьютерта һургаха тусхай һуралсал эмхидхэхэ. 

Тэдхэбэриин жасын электронно хангамжануудай мүнөө үеын эгээл эдэбхитэй хэрэглэгшэд гэхэдэ, үндэр наһатайшуул болоно гэжэ тэмдэглэхэ хэрэгтэй. Гүрэнэй тэдхэбэри (пенси) тогтоохо болон тэрэниие түлэхэ, тэдхэбэри абагшада асаржа үгэдэг эмхинүүдые һэлгэхэ тухай мэдүүлгэнүүд Тэдхэбэриин (Пенсиин) жасын сайт дээрэ “Эрхэтэнэй хубиин таһалгада” ороһон бүхы хандалгануудай 80 хуби хүрэнэ гэжэ тоо баримтанууд харуулна. Гадна уласаймнай ажаһуугшад гэрһээ гарангүй, интернедээр элдэб дансануудые захиха дуратай, ниигэмэй элдэб хангамжануудые абадаг болохо, эхын (гэр бүлын) капитал гэхэ мэтые дансалха тухай мэдүүлгэнүүдые олоор эльгээдэг. Мүн тиихэдэ наһатайшуул гэрһээ гарангүй элдэб асуудалнуудтаа тодо харюу абажа һуранхай. 

Ородой Холбооной Тэдхэбэриин жасын Буряад Уластахи таһагай хэблэлэй албанай гэрэл зураг дээрэ:

Сэдьхэлэй үбшэндэ нэрбэгдэһэн зоной харууһалагдадаг Мухар- Шэбэрэй интернадай байшан