​Хорото бодос хорихо

Вейп түхэлэй электрон тамхи хуулиин наһа гүйсөөгүй үхибүүдтэ худалдахые хорихо тухай хуулиин түсэл Буряад Уласай Арадай Хуралай һунгамалнууд Игорь Зубарев болон Виктор Малышенко хоёр зохёожо, уласай парламентын үзэмжэдэ табихань.

Энээн тухай Арадай Хуралай Гүрэнэй байгуулалтын, нютагай өөһэдын хүтэлбэриин, хуули ёһоной болон гүрэнэй албанай асуудалнуудай талаар хорооной түрүүлэгшын орлогшо Виктор Малышенко уржадэр болоһон түсэблэлгын зүблөөн дээрэ мэдээсэбэ. 

Үхибүүдээ аршалая

Вейпые миин тамхинай орондо зарим зон татадаг юм байна. Тэрэнэй багахан капсула соо хорото бодос – никотин мүн лэ хэгдэнхэй. Энэ электрон тамхи татахада, ехэ гэгшын утаан, уурал гаража, үхибүүдэй һонирхол ехэтэ татадаг. Тэдэниие хэрэглэһэн үхибүүдэй бэедэ хорото бодостой энэ зүйл муу нүлөө үзүүлнэ. 

“Иимэ тамхи хуулиин наһа гүйсөөгүйшүүлдэ худалдахые хорихо тухай хуули манай гүрэндэ мүнөө үгы байна”,- гээд Арадай Хуралай һунгамал тодорхойлно. 

Гүрэнэй хэмжээндэ иимэ хорилтын үгышье һаань, нютаг можонуудай хуули зохёон гаргадаг зургаанууд өөһэдынгөө дэбисхэр дээрэ хорихо эрхэтэй юм. Виктор Малышенко зүблөөн дээрэ үгэ хэлэхэдээ, манай парламентын гэшүүдтэ хандажа, энэ хуулиин түсэл дэмжэхыень уряалба. Арадай Хуралай ээлжэтэ сессинүүд дээрэ тэрэниие зүбшэн хэлсэхэ юм. 

Вейп гээшэ юун бэ? 

Тамхиншадай татадаг юрын тамхинай орондо вейпүүд мүнөө олоор хэрэглэгдэдэг болонхой. Тиимэһээ иимэ электрон тамхинда дуратайшуулай нэгэдэлнүүд зарим оронуудта, тэрэ тоодо манайшье гүрэндэ бии болоо юм. Вейп гү, али ондоогоор хэлэхэдэ, электрон тамхин – шэнгэн зүйлые уурал болгожо, тамхинай утаанай орондо һорохо бодос гаргадаг юм. 

2004 ондо Гонконгдо хуулита ёһоор зүбшөөлэй үнэмшэлгэтэй болоһон. Үйлэдбэрилэгшэдэй һанамжаар, энэ зүйл гансал никотинтай байдаг хадаа юрын тамхинда орходоо балай ехэ тодхор хүндэ татадаггүй гэхэ юм. Харин эрдэмтэд ондоогоор бодомжолно. Элүүрые хамгаалгын Бүхэдэлхэйн эмхи 2014 ондо вейпүүдые тамхиндал адляар хизаарлаха хэрэгтэй гэжэ дурадхаа. 

Зарим гүрэнүүдтэ тэрэниие хуулиин ёһоор хоринхой. Манай гүрэнэй хэдэн нютаг можонуудта, тодорхойлбол, Ставрополиин хизаарта иимэ хорилто табигдаһан юм. Хэды тиигэбэшье, вейпүүдые хэрэглэдэг хүнүүд дэлхэй дээрэ олошорһоор. Энэнь гансашье эмшэдэй бэшэ, мүн манай һунгамалнуудайшье һанаа зобооно.