1197
Хэжэнгэ аймагай түб тосхонһоо холо бэшэ үзэсхэлтэ һайхан газарта элүүржүүлгын лагерь июлиин 22-то баярай оршон байдалда үүдээ сэлин нээбэ.
Энэ амаралтын газарай гол илгаа гэхэдэ, мүнөө элбэгээр хэрэглэгдэдэг бэедэ харша хэмэл материалнууд энэ барилгада оруулагдаагүй. Һэеы гэрэй болон ордонуудай түхэлтэй модон барилганууд харагдана. Хүбүүд, басагадай унталгын байранууд. Хоорондонь - нюур гараа угаадаг, мүн бэеэ заһадаг газар. Үргэн, ута болодог оронууд дээрэ унтариин 2 комплект табяатай. Тиихэдэ бэеэ угаадаг душевойнууд байна. Эмнэлгын, мүн хоол баридаг газарнуудта бүхы хэрэгтэй түхеэрэлгэнүүд тодхоотой. Лагериин дэбисхэр дээрэ бэеэ һорихо янза бүриин хэрэгсэлнүүд бии. Тааруу зохид конференц-зал соо албанай хэрэгээр уулзалгын болон танилсалгын хэмжээ ябуулгануудые эмхидхэмээр.
Тус элүүржүүлгын лагерьта бусад аймагуудай хүүгэдые амаруулха гэжэ хараалагдаһан тула саашадаа энэ амаралтын газар бүхы Буряад Уласай хэмжээнэй болохо юм.
Урдань пионернүүдэй лагериин байһан газарта шэнэ амаралтын газар байгуулха тухай дүрбэн жэлэй саана Хэжэнгэ аймагай засаг дарга Геннадий Лхасаранов үүсхэл гаргаһан байгаа. Аймагай бүхы ажаһуугшад энэ хэрэг дэмжэжэ, «арадай барилга» захалаа бэлэй. Нютагай захиргаан мүнгэ һомолоо. Олзын хэрэг эрхилэгшэд, ветеранууд болон бусадшье зон арга шадалаараа оролсоо.
Буряад Уласай Засагай газар болон Арадай Хурал хажуу тээһээ хараад байгаагүй. Уласай мүнгэн һангай жасаһаа 6 сая түхэриг һомологдоо. Буряадтаа мэдээжэ меценат, Хэжэнгэ болон Хори аймагуудһаа Буряадай Арадай Хуралай һунгамал, «Номто» гэһэн тамирай түбэй юрэнхылэгшэ Валерий Доржиев барилгын эхинһээ эсэс хүрэтэр ехэ туһа үзүүлжэ, хоёр сая тухай мүнгэ үгэһэн байна. Хүндэтэ һунгамалдаа хэжэнгээрхин баяраа мэдүүлээ. Буряадай засаг зургаануудай болон Арадай Хуралай зүгһөө янза бүриин амаршалгын бэшэгүүд болон бэлэгүүд лагерь нээлгын үедэ ороо. Элүүржүүлгын лагериин нээгдэһэн ушараар аймагай захиргаан ДЮСШ-да «Газель» түхэлэй автобус бэлэглээ.
Нээлгын баяр ёһололой үедэ
Унталгын таһалга
Авторай гэрэл зурагууд
Автор: Владимир ШИРАПОВ
