​Дагестанай хүүгэд ёохор хатарба

Аяар холын Каспиин далайн эрьедэ оршодог Дагестан Уласай хүбүүд, басагад “Байгалай долгинууд” гэһэн элүүржүүлгын түбтэ эдэ үдэрнүүдтэ амаржа байна. Буряад Уласай Дотоодын хэрэгүүдэй талаар яаманай урилгаар тэдэ ерэнхэй. 

Дагестанай 20 үхибүүдэй абанар албанайнгаа хэрэгүүдые дүүргэжэ байтараа баатарай үхэлөөр унаһан юм. Иимэ эртэ эсэгэнэрээ алдаһан хүүгэдтэ туһа хүргэжэ байхада ехэ буянтай гээд һанагдана. Дагестанай Дотоодын хэрэгүүдэй талаар яаманай сайд Абдурашид Магомедовэй хэлэһээр, үхибүүдые амаруулха тухай хоёр жэлэй саада тээ хэлсэгдэһэн юм.

- Буряадай полициин алба хаагшад тиихэдэ манай Дагестан ерэһэн байна. Манай тэндэ хуули сахижа байгаа нютагайнгаа хүбүүдтэй уулзаха үедөө иимэ дурадхал манда оруулаа бэлэй, - гэжэ Абдурашид Магомедов хөөрэнэ. – Жэлшье болонгүй хүүгэднай Байгал ошоһон байна. Мүнөө тэдэнэр хоёрдохиёо Буряад орон ерэбэ гээшэ. 

Оройдоол долоон хоногой туршада Дагестанай үхибүүд олон шэнэ нүхэдтэй болоо. “Байгалай долгинууд” гэһэн түбтэ амаржа байһан бүхы хүүгэдтэй танилсаа. 

Махачкала хотын 36-дахи һургуулиин 13 наһатай шаби Милана Абдулкеримова буряад хэдэн үгэнүүдые мэдэхэ болоо.

- Ехэ гоёор амаржа байнабди. Ходо һонирхолтой хэмжээ ябуулганууд үнгэргэгдэнэ. Эндэхи үхибүүд манай ёһо заншал мэдэхэ дуратай. Гахайн мяха эдихэгүйһөө эхилээд, һонирхолтой мэдээнүүдые хөөрөөбди. Бидэшье эндэхи заншалнуудые мэдэхэ болообди, - гэжэ Милана хөөрэнэ. 

Дагестанай хүбүүд, басагад үдэшэ бүри дуратайгаар хатарай дискотекэдэ хабаададаг. Юуб гэхэдэ, тэндэ мүнөө сагай мэдээжэ хүгжэмһөө гадна буряад, дагестан аялга зэдэлнэ бшуу. Тэрэ хүгжэм доро хүүгэдэй бэе бэеынгээ хатарнуудта һуража байһандань баярламаар. 

Үнгэрһэн долоон хоногой эсэстэ амаралтын ээлжээтэ халаанай нээлгэдэ зорюулагдаһан баяр ёһололдо Дагестанай үхибүүд ёохор хатараа. Мүн Буряадай хүүгэдэй лезгинкэ хатархада, урмашамаар байгаа.

Байгал далайн уһанда ороһондоо Манскент һууринай Абу Ибрагимов баяртай байна.

- Манай Каспиин далайда ороһондол адли байгаа. Ганса уһаниинь тунгалаг байна, - гэжэ Абу хөөрэнэ. – Бүхы үхибүүдэй һайнаар маанадта хандахадань, ехэл аятай байна. Үшөө тиихэдэ ой соо амаржа, сэбэр агаараар амилнабди. Дагестанай хүүгэд үшөө арба хонохо. Энэ хугасаа соо тэдэниие Буряадай һонирхолтой газар дайдаар ябуулха, соёл, ёһо заншалнуудтай танилсуулхаар түсэблэгдэнэ.

Хүүгэд лезгинкэ хатарнад 

Авторай гэрэл зурагууд