​Хадын горход үерлөө

Буряад һайхан ороноймнай булан бүхэниинь ондо ондоо: хада уулатайшье, үргэн налагар, заха хизааргүй талатайшье, нуур тооромтой, хүбшэ тайгатайшье. 

Аймаг, нютаг бүхэнэймнай байгаалишье өөрын онсо илгаатай, дабтагдашагүй һайхан юм. Буряад орон болбол ерэһэн, ошоһон айлшадай нюдэ хужарлуулха, сэдьхэлынь тэниилгэхэ гайхамшаг ехэ хүсэ шадалтай. 

Эндэ үдэһэн, энхэ жаргалаа эдлэһэн, эблэржэ нүхэсэһэн зуугаад гаран арадуудай түлөөлэгшэд – бидэ, түрэл нютагаараа омогорхон баясадаг гээшэбди. Алтан дэлхэйн агууехэ баялиг – алдарта Байгал далаймнай, Саяан хадын манлай – мүнхэ саһаар хушаатай мүнгэн дуулгата Мүнхэ Һарьдагнай, Бархан ехэ ууламнай, залгаа ехэ Сэлэнгэмнай, дээдын шанарай шулуун нүүрһэнэй хэбтэшэ хадагалан нюуһан үргэн сагаан Түгнын таламнай, Яруунымнай олон нуурнууд, тоогүй олон аршаан булагууднай, хүйтэн газараймнай хүбшэ тайгань булга, халюугаараа элбэг баян, ута, үргэниинь хэмжэшэгүйл... 

Гэхэтэй хамта, уларилай шэнжэ нютаг бүхэндэмнай баһал янза бүриин. Янгинама хүйтэниинь январь һарада зарим газарта 54 градус хүрэхэ, али нэгэ тээ ааяма халууниинь 40-өөд градусһаа дээшэ дабаха. Нэгэ таладань халуун наранай гамгүй шаража, гандаһан дайдаяа абархын тула шииг нойто эльгээхыень бурхадаа зоной гуйжа байхада, нүгөө захадань аадар бороон үлүү ехээр адхаржа, үерэй аюул тохёолдохо юм. 

Эгээл иимэ байдал энэ һарын эхиндэ дайралдаа. Буряадаймнай баруун урда оршоһон бахархама һайхан байгаалитай баян дэлгэр Аха нютагта борооной ехээр ороходо, хадын голнууд харьялан, хоёр боориһоонь халин гаража, үер болоод, тэндэхи улад зоной һанаа ехэтэ зобоогоо. Хоёр нюдөөрөө хараһан хүнүүдэй гэрэл зурагта буулгаһан хэдэн үзэгдэлнүүд – танай анхаралда.

Тустаг голой хүүргэ уһанда абтаа

Цыпилма ПАЛЫЕВАГАЙ гэрэл зураг

Тон дээрэхи гэрэл зураг дээрэ: Урда Булан Үбэрэй зуһалан. Үдэшын һаалидаа үнеэд орожо ябана

Тамара ДАМБАЕВАГАЙ гэрэл зураг