​Найман ханатай байшандаа найраа хэхэл монгойнхид

Бабанта аймагай ори ганса буряад һууринда соёлой байшан шэнээр баригдахань. Һонирхолтойнь гэхэдэ, тус байшан найман ханатай байха юм. Энээние “Монгой” гэһэн ТОС бариха гэжэ түсэблэнхэй. 

Монгой һууринда һүүлэй байдалаар оройдоол 200 гаран хүн ажаһууна. Совет үедэ эндэ томо колхоз байһан юм. 90-ээд онуудта эндэһээ олон хүн гаража ошоһон. Харин түрэл нютагтаа үлэһэн зон ажалгүй һуунагүй. ТОС байгуулаад, ажабайдалаа һайжаруулха гэжэ оролдоно. Тиимэһээ эндэ ходо субботнигууд эмхидхэгдэжэ байдаг. 

- 30 гаран жэлэй саана соёлой байшангүй болообди. Тиигэжэ олон хэмжээ ябуулгануудаа айлай гэрнүүд соо эмхидхэдэгбди, - гэжэ англи хэлэнэй багша, ТОС-ой эдэбхитэн Мэдэгма Бальжинимаевна Дашиева (зураг дээрэ) хөөрэнэ. - Манай нютагаархин барилгын модо орууланхай, байшан бодхоохо ажал үлөө. Үшөө 2015 ондо бидэ 200 мянган түхэриг мүнгэ ТОС-уудай дунда уласай мүрысөөндэ шүүһэн байнабди. Мүнөө сагай эрилтэдэ харюусама евросонхо, шэнэ пеэшэ, үүдэ тэрэ мүнгэндөө абаабди. 

Энэ хүнгэн бэшэ ажалые “Монгой” ТОС саг соонь бүтээхэ байха гэжэ һанагдана. Юуб гэхэдэ, Амалат гол дээгүүрхи Бабанта аймагай түб болохо Багдарин һууринтай холбодог хүүргэ 2014 ондо шатажа, хүшэр байдал тохёолдоо бэлэй. ТОС-ой хүсөөр хүүргэ шэнээр бариха гэжэ шиидхэбэри абтаа һэн. Багдарин һууринда, Улаан-Үдэ, Шэтэ, Эрхүү болон бусад хотонуудта ажаһуудаг нютагаархидынь мүнгөөр туһалаа. Шадалтай эрэшүүл ойдо модо бэлдэһэн байна. Эхэнэрнүүд хүүргэ баригшадые эдеэ хоолоор хангаа. Тиигэжэ тэдэ өөрынгөө хүсөөр 92 метр утатай хүүргэ түргэн саг соо барижа, ашаглалгада тушаагаа, Монгой һууринда ехэ найр болоо бэлэй. 

Үшөө тиихэдэ эндэһээ гаража ошоһон хүн зон нютагаа бусажа, обоо тахилаа һэргээнэ.