​Аршаан булагуудаа ариг сэбэр байлгадаг

Ивалга аймагай Хурамша һууринай ТОС-ууд аршаан булагуудтай газарнуудые сэбэрлэхэ талаар аргагүй ехэ ажал ябуулжа байна гээд хэлэхэ шухала. “Гильбиринское” гэһэн хүдөөгэй захиргаанай толгойлогшо Евгений Дабаевич Бадмаев энээн тухай манай сурбалжалагшада хөөрэбэ.

- Манай һууринда зургаан ТОС тоологдоно. Тэдэ нютагайнгаа түхэл шарай һайжаруулхын хажуугаар, нютагайнгаа олон тоото аршаан булагуудай оршон тойрониие сэбэрлэнэ. Ноолиин аршаан шадар һүүлэй 5-6 жэлэй туршада гэрнүүд бодхоогдоһон байна. Мүнөө жэлдэ тэндэ бани болон хоол баридаг гэр табигдаа. Ухаа Толгойн аршаанай газарта торхонуудай байра заһабарилагдаа. Тэндэ нэгэ томо, хоёр багахан гэрнүүд бодхоогдонхой. Жэлэй дүүрэтэр хоол баридаг байшан бариха түсэбтэйбди. 

- Танай нютагай аршаануудта ямар үбшэнүүдһээ эмшэлдэг бэ?

- Ноолиин аршаанда амисхаалай, махабадай үбшэнүүдһээ аргалдаг. Мэнгээрһэн хоолойн (бронхын) үбшэтэй, астматай хүнүүд ерэжэ амардаг гээшэ. Ухаа Толгойн аршаан радонтой. Тиимэһээ яһанай үбшэнүүдые аргалхаяа зон эндэ ерэдэг. Зундаа дунда зэргээр 150-200 хүн бэе махабадаа һайжаруулхаяа манай аршаануудта ерэдэг. Эндэ үбэлдөө амарха эрхэ байдал үгы. Ангуушад лэ үбэлдөө эдэ байрануудта орожо хонодог.